Anglo American aatsitassarsiorsinnaanermut akuersissuteqalerpoq

Matumuuna Aatsitassanut Suliffeqarnermullu Naalakkersuisoqarfiup, Anglo American Exploration Overseas Holdings Limited (”Anglo American”), Kalaallit Nunatsinni aatsitassarsiornermut akuersissummik tunineqarnera, nalunaarutigaa.

Anglo American Kalaallit Nunatta kitaani, Upernaviup Kujataani, misissuinissamik akuersissutinik marlunnik tunineqarpoq. Taakku saniatigut Anglo American piffimmi nalinginnaasumi, Kitaani misissueqqaarnissamik akuersissummik tunineqarpoq. Akuersissutit pingasut tamarmik ulloq 31. december 2023-p tungaanut ukiuni tallimani atuuttussatut tunniunneqarput. Ujarlernerit nikkeleqarneranik, kanngussaqarneranik, saviminissartalinnillu platin-inik misissuinerussapput.

Aatsitassanut Suliffeqarnermullu Naalakkersuisoq Erik Jensen tassunga atatillugu ima oqaaseqarpoq: “Anglo Americanip Kalaallit Nunatsinnut uteqqinnera, Kalaallit Nunaata aningaasaliisartunik nunatta avataaneersunik nunatsinni aatsitassarsiornissamik aningaasaliinissamut pilerilersitsiniarluni sulinerata angusaqarfiuneranut ersiutaavoq. Naalakkersuisut Kalaalit Nunatsinni aatsitassatigut periarfissanik nittarsaassinertik, nunanilu allani aningaasaliisartunik suliffeqarfinnillu pilerilersitsiniarnermik suliaqarnini nangillugu ingerlattuarumavaat."

Anglo America plc. nunarsuarmi aatsitassarsiorfiit annerpaat ilagaat, taamaalillunilu Kalaallit Nunaanni akuersissutaateqarsimasut annerpaartaannut ilaalissaaq. Anglo Americanip polymetallisk magmatiske sulfidenik taaneqartunik (kanngussak aqitsumik, nikkelimik saviminissanillu platinilinnik) ujarlerneq aallunniarpaa. Anglo Americanip Kalaallit Nunatsinni aatsitassanik taakkunannga nassaarnissamut periarfissaqarluarnerarpaa.

Tusagassiuutitigut nalunaarut manna pillugu paasissutissat sukumiinerusut, Aatsitassanut Suliffeqarnermullu Naalakkersuisoqarfiup pisortaanut Jørgen T. Hammeken-Holmimut saaffiginninnikkut, pissarsiarineqarsinnaapput: Oqarasuaat: (+299) 346846 email: joeh@nanoq.gl