Savaateqarnermut aningaasaliissutigineqartartut naammattariaqarput

Savaateqarfik Nunalerineq pillugu Siunnersuisooqatigiit 43-russaannik Qaqortumi juulip aallaqqaataani 2019-imi ataatsimiipput.

Nunalerinermik siunnersorteqarfiup, Qaqortumiittup, 2018-imut naatsorsuutai akuerineqarput. Nunalerineq pillugu Siunnersuisoqatigiit savaatilinnik isumasioqatigiisitsimaneq ilanngullugu aamma oqaluuseraat.

Nunaateqarnerup aamma savaateqarnerup 2030-mut anguniagassartalerlugit ineriartortinneqarnissaanut siunniussassanik ujartuinertut isumasioqatigiisitsimaneq iluarisimaarpaat.

Nunalerineq pillugu Siunnersuisooqatigiit ataatsimiinnerminni inassutigaat nunalerineq savaateqarnerlu ineriartortinneqassappata, inuussutissarsiutinut aningaasaliissutigineqartartut naammattariaqartut.

Siunnersuisooqatigiillu aamma erseqqissarpaat nunaateqarnermut savaateqarnermullu Namminersornerullutik Oqartussanit aningaasaliissutigineqartartut siunissami ikilisarneqassanngitsut.

Namminersorlutik Oqartussat nunalerinermik inuussutissarsiuteqartunut aningaasalersuinermik ukioq manna tapiissutaat 13,7 million koruuniupput.

Tunisinermut tapiissutit uumasuutinut Narsami toqoraavimmut tunineqartunut imaluunniit toqoraavinnut uumasut nakorsaasa akuerisaannut allanut suliareqqitassanngorlugit tunniunneqartunut ilaatigut tapiissutaasarlutik, taamaalilluni nunatsinni tunisassiat akikinnerunissaannut tapiissutaasarlutik.

Tapiissutigineqartut saniatigut assigiinngitsunik aningaasaliisoqartarpoq, soorlu erniaqanngitsunik taarsersugassaangitsunillu aamma ernialinnik taarsersugassanillu atukkiisoqartarluni.

Nunaateqarneq pillugu Siunnersuisoqatigiit isumasioqatigiinnermi saqqummiunneqartut iluarisimaarpaat. Oqaluuserineqartut suliarineqarnissaat pillugit Siunnersuisoqatigiit malinnaaffigalugillu nakkutigissamaarpaat, soorlu aamma suliassat pingaarnersiortarumaaraat.

Savaatillit peqatigiit Suleqatigiissut juunip 28-anni 2019-imi ataatsimeersuarput. Siulersuisunngortut Nunalerineq pillugu Siunnersuisooqatigiinnut ilaasortassanik nutaanik toqqaassapput.

Siunnersuisoqatigiinni ilaasortaasimasut Otto Nielsen aamma Karl Kleist suleqataalluarsimanerinut qutsavigineqarput.

Nunaateqarneq pillugu Siunnersuisooqatigiit Inatsisartut inatsisaat normu 15, 19. november 2007-imeersoq naapertorlugu pisussaaffeqarput Aalisarnermut, Piniarnermut Nunalerinermullu Naalakkersuisumut nunalerineq pillugu siunnersuisinnaassallutik.

Savaatillit ullumikkut 38-upput, tuttuutillit marluullutik.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi Nunalerineq pillugu immikkoortortami pisortaq, Pollas Lyberth. E-mail: poly@nanoq.gl