KANUAANA: Kuunni qassusersorluni eqalunniarneq inerteqqutaavoq

Kalaallit Nunanni Aalisarsinnaanermut Akuersissutinik Nakkutilliisoqarfiup, KANUAANA, piniarnermik nakkutilliisuisa aamma aalisarnermik nakkutilliisuisa oqaatigaat ulluni makkunani unioqqutitsilluni eqalunniarniartoqartartoq.

Piniarnermik nakkutilliisoq Ole Jerimiassen, Ilulissat, oqarpoq nunaqarfiusimasup eqqaani eqalunniartarfimmi kuummi allunaasarpassuarnik atorneqarsimasunik takusaqarsimalluni. Erseqqissaavorlu Ilulissani politiit qassutit marluk ataatsimut uigunneqarsimasut qimatat tigusimagaat, qassutinik piginnittoq qassutiminut ilisarnaasiisimanngimmat.

Erseqqissarusulluinnarparput eqalunniarneq pillugu Namminersornerullutik Oqartussat nalunaarutaat naapertorlugu kuunni taakkualu tasinngortaanni qassusersorluni eqalunniarneq tamarmi inerteqqutaalluinnarmat, aamma qassutit piginnittup aqqanik, angallatip aqqanik angallatilluunniit normuanik nalunaaqutsersimasussaapput, KANUAANA-p pisortaa Mads Nedergaard oqarpoq.

Mads Nedergaard erseqqissaavoq aalisartut eqalunniarneq pillugu nalunaarut naapertorlugu aalisartussaatitaammata.

Eqalunniartilluni qarsorsat taamaallaat nuannariinnarlugu aalisarnermi atortakkat, qalut naatsunguamik ipullit qassutillu nigartunerat tasillugit minnerpaamik 100 milimeteriusut, piniutitut atorneqarsinnaapput.

Qassutit eqalunniarnermi atorneqartut 30 meter sinnerlugu takissuseqassanngillat. Qassutit piginnittup aqqanik, angallatip aqqanik angallatilluunniit normuanik nalunaaqutsersimassapput.

Qassutit qaqinneqassapput
Nalunaarut naapertorlugu qassutit ningisimatillugit nakkutigineqartuassapput. Eqalunniarfik qimanneqarpat piffissaq apeqqutaatinnagu piginnittup qassutini qaqissavai.

Eqalunniartilluni sanninngaariniarneq, qassutit tissukartittakkat, ungusilluni qalusiniutit qalorsuillu atoqqusaanngillat, aamma innaallagiaq atorlugu qupinnguallatsitsineq, aallaasit, qaartartut toqunartullu, aamma pullatit.
Kommunalbestyrelse kommunip pineqartup killeqarfiisa iluanni eqalunniarnermi pullatit atorneqarnissaannut akuersissuteqarsinnaavoq.

Qassusersornermi malittarisassat
Kuunni taakkualu tasinngortaanni qassusersorluni eqalunniarneq tamarmi inerteqqutaavoq. Tatsini eqalunniarnermi kuuit tatsimut akuaniit kuuillu aariaanniit 100 meterinit qaninnerusumut qassuserneq inerteqqutaavoq.

Tatsini qassusersornermi qassutit tatsip sinaaniit akimut ikertussusiata aggornerisa pingajorarterutaat sinnerlugu takissuseqassanngillat.

Kuup akuani nalinginnaasumik ulinnerpaaffianiit kuup immallu naapiffianniit illugiinnik kuuk 150 meterinit qaninnerullugu, kuup sinaa aallaavigalugu uuttorlugu, qassusersorneq inerteqqutaavoq.

Ungasissusissamit tassannga alimasinnerusukkut kommune qassusersorfissap killissaanik nalunaaqutsiisimappat, nalunaaqutsikkap iluani qassusersorneq inerteqqutaavoq.

Qassutit timaatungaat ulinnerani immap angusagaanut attuumasunngorlugit nivinngarneqartassapput. Qassutit imartap ikertussusiata pingajorarterutaa sinnerlugu takissuseqassanngillat.

Qassutit narlusuumik nunamiit avammoorlugit nivinngarneqassapput. Amerlanaarlugit pisaqarnissaq siunertaralugu qassutit allatut ilusilerlugit nivinngarnissaat inerteqqutaavoq. Qassutit eqalunniutit qassutinut tullernut minnerpaamik 30 meterinik akunnilerlugit nivinngarneqartassapput.

Ujaqqanik sapusiat atorlugit eqalunniarsimagaanni eqalunniarfik qimatsinnagu saputit ingerlaarfeqalerlugit ammarneqassapput.

Attavigineqarsinnaasoq Ole Jerimiassen, piniarnermik nakkutilliisoq, Ilulissat. E-mail: olej@nanoq.gl Tlf nr: 345368/546619