Inissiat taartissat Avannaata Kommunianut tunniunneqarnissaat

Nuugaatsiamiit Illorsuarniillu innuttaasunut tassaarsuarmit eqqugaasunut inissiat taartissat ingerlaavartumik naammassineqartalermata tunniunneqangajalerput iserterfigineqangajalerlutillu.

Inissiat taartissat sananeqarnerinut Namminersorlutik Oqartussat isumaginnittuupput, aammalu inissiat suliallu immikkoortui allat tamarmik tunniunneqarnissaasa tungaannut suli akisussaasuusussaallutik.

Innuttaasunut tunniussinissarpiamik aqutsineq eqaannerulersinniarlugu Avannaata Kommuniata illut tamakkiisumik tunniutissagai kommuni suleqatigalugu isumaqatigiissutigineqarpoq. Illut naammassillutik sananeqareernerminni Namminersorlutik Oqartussanut sanatitsisuusunut tunniunneqaraangata inuttassaannut tunniunneqartassapput.

Illut innuttaasunut tunniunneqarnerini kommuni sanaqateqarluni illuliortunut taarsigassarsititsisassaaq, taakkulu inatsit naapertorlugu erniaqanngillat akilersugassaanatillu, ukiunilu 20-ini annikillitikkiartuaarneqartussaallutik. Taamaalilluni kommuni innuttaasut qanillugit kiffartuussinermik isumaginnittuussaaq, tassunga ilanngullugu maleruagassat naapertorlugit uppernarsaatit eqqortut isumagissallugit. Tassalu kommunip inissianik piginnittuunerup innuttaasunut, eqqortumik inissiamik taartissamik tunineqartussaasunut tunniunneqarnissaa akisussaaffigissavaa.

Ineqarnermut Attaveqaqatigiinnermullu Naalakkersuisoq Karl Frederik Danielsen oqarpoq:

”Innuttaasut tassaarsuarmik eqqugaasimasut angerlarsimaffissaminnut nutaanut nuungajalermata nuannaarutigisorujussuuara. Neriuppunga avatangiisit nutaat 2017-imi qaqqap sisoorneratigut ajunaarnersuarmit eqqugaanermik naggaseeqataassasut. Tunniussinisaq tamarmiusoq pillugu isumaqatigiissut, innuttaasut tassaarsuarmit eqqugaasut Avannaata Kommunianit innuttaasut qanillugit sullinneqarnissaannik pisariaqartumik qulakkeeriffiusussaq naammagisimaartorujussuuara. Neriuppunga innuttaasut angerlarsimaffissatik nutaat nuanneriumaaraat iluarusuutigiumaaraallu, aammalu innissiat nutaat siunissamik pitsaasumik siunnerfeqarsinnaanissamut iluaqutaajumaartut.”

Annertunerusumik paasisaqarusunnermi: Inussiarnersumik Naalakkersuisup allattaa Anders Samuelsen ansa@nanoq.gl imaluunniit oqar.nr. 345456 aqqutigalugu saaffigeqquneqarpoq.