Tasiilami ilinniarfimmi periarfissat pillugit nalunaarusiaq

Tasiilami ilinniarfimmik pilersitsinissamik periarfissat pillugit sivisuumik sulissutigereerlugu nalunaarusiaq saqqummiunneqarpoq.

Naalakkersuisut anguniagaraat qulakkiissallugu, nunatta ilinniarluarsimasunik nammineq peqalernissaa. Nunarput angisoorujussuuvoq ilinniartitaanerlu kivinneqartariaqarpoq, tassuunakkut ilinniarfiusinnaasunik pilersitsinissamut periarfissanik ammaassisariaqarpugut, ilinniartut piginnaasat inerisarlugit qaffassarlugillu, sumi najugaqarneq, suiaassuseq ukiullu apeqqutaatinnagit, inuttut, kulturikkut oqaatsitigullu tunuliaqutit aamma apeqqutaatinnagit. Taamaattumik pingaarutilerujussuuvoq suut ilinniarfiit Tasiilami periarfissaanersut qulaajassallugit.

Meeqqat atuarfiini atuartut naammassereeraangamik inuussuttut ilinniarfiinut ingerlaqqillutik naammassinnittartut amerliartoraluartut, inuusuttortarpassuavut piginnaalersitsisumik ilinniagaqaqqinneq ajorput. Ajoraluartumik misissuinerit takutippat, meeqqat atuarfiinit naammassinnereerlutik ingerlaannartumik ingerlariaqqinngitsoortunut piginnaalersitsisumik ilinniagaqaqqinnissamut ajornakusoornerulersitsisartoq. Nalunaarusiap ilaatigut takutippaa, Inuussutissarsiutigalugu Ilinniakkanut ukiuni 2015-2017-illu akornanni Tasiilameersumik ilinnialertoqarsimannginnera. Pissutissarpassuaqarsinnaavoq. Assersuutit ilaat tassaasinnaapput Inuussutissarsiutigalugu Ilinniakkamut aqqutissiuunneqarluarsimannginneq, ilaatigullu praktikerfissaaleqineq.

Taassuma saniatigut nalunaarusiap takutippaa, innuttaasut amerlanerpaartai suliffissaaleqisuusut, nalunaarsorneqarsimallutik Tasiilami Matchgruppe 1-imut, taakkulu ilinniagaqarsimasuunngillat. Amerlanerpaat ilinniagarisatuaraat meeqqat atuarfiannik naammassinnillutik soraarummeeruteqarnertik, imaluunniit meeqqat atuarfianni naammassillugu atuarsimanngitsut.

Tunumi sivisoorsuarmik ileqquuvoq kusanarluinnartunik assuutinik immikkuullarittunik atisaliortarneq aamma sanaluttarneq. Taakku ileqqut aammalu assassornerit kinguaariinnut tullernut ingerlateqqinneqartussaapput. Pingaaruteqarluinnarpoq nammineq najukkami ingerlanneqarnissaat. Ilinniartitsinikkut amminik mersorneq qaffassarneqartariaqarpoq nammineq najukkami attuumassuteqartunit ingerlanneqartuuguni tamanut iluaqutaassagaluarpoq. Tassunga suliamut perorsaanikkullu qaffassaanikkut tunumi ilinniartitsisinnaasunik peqalissagaluarpoq.
Naalakkersuisoq Ane Lone Bagger ima oqaaseqarpoq: ”Uuma nalunaarusiap takutippa, ilinniartitaanerup kisimi ukkatarineqarnissaa naammanngitsoq kulturikkut suliniutit ingerlanneqarnissaanni. Tamanna ataatsimut isigalugu suliniuteqarnissarput pisariaqarpoq, tamaviaarlutalu sulissutigissavarput, meeqqat atuarfiini naammassinnittartut ilinniaqqinnissaannut aqqutissiuussinissarput”.

Tasiilami ilinniartitaanermut suliniutit nalilersuinermik ineriartortitsinermik aamma ilaapput, tamannalu massakkut ingerlanneqarpoq, taassumalu saniatigut immikkut ittumik najornagit ilinniartitsinerit, aamma qarasaasiaq atorlugu ilinniartitsineq (e-læring) Sisimiuni GUX-imit ingerlanneqarpoq, gymnasiami ilinniarnertut ingerlasut sumiluunniit nunami inissisimagaluaraanni eGUX-imik taallugu.

Erseqqinnerusunik paasissutissinneqarusukkaanni Ilinniartitaanermut, Kultureqarnermut Ilageeqarnermullu Naalakkersuisoqarfimmi immikkut siunnersorti, Sussi Wille, oqarasuaat: 345616 atorlugu attaveqarfigineqarsinnaavoq.