Kujataani atukkat qanoq pitsanngorsarneqarsinnaappat?

Inuussutissarsiornermut, Nukissiuuteqarnermut Ilisimatusarnermut Naalakkersuisoq Jess Svane aamma Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen arfininngornermi, sapaammi aamma ataasinngornermi kujataani paasisassarsiorlutik angalapput.

Jess aamma Martha Igalikumi, Qaqortumi, Eqalugaarsunni, Alluitsup Paani, Nanortalimmi, Narsarmiini, Qassiarsummi Narsarsuarmilu ataatsimiisitsipput.



Kujataani ajornartorsiutaasut periarfissallu pillugit kommunimi politikkerinik innuttaasunillu qanimut oqaloqateqarnissamik angalaneq siunertaqarpoq.

Ilaatigut takornariaqarnerup aallartnisaasunullu tapiissuteqartarnermut aaqqissuussinerit komunimi innuttaasunut tulluassakkanik ineriartortitsinerup Naalakkersuisut politikkiat qanoq qulakkeerneqarsinnaanersoq pillugu politikerinik innuttaasunillu Jess Svane oqaloqateqarpoq.

Jess Svane ima oqarpoq:
”kissaatit tigussaasut isumassarsiallu allaqartut angerlaappakka. Takornariaqarnerup piujuartitsinermik tunngaveqartumik ineriartortinneqarnissaa tamanit kissaatigineqartoq ersarippoq. Takornariaqarnermik sullissisut amerlasuut eqqagassalerinerup pitsaanerusumik isumaginninnissatsinnik kissaateqarput. Eqqakkanik pinngortitamut takornarianut takutikkusutatinnut qimatsiinnartarnerput pitsaasuunngilaq. Allagartaliinissamik, eqqaavinnik containeriusunik kiisalu pisuffissianik sanaartortoqarnissaa pisariaqartoq amerlasuunit kissaatigineqarpoq.

Kissaatigineqartut takornariaqarnermut periusissiamut nutaamut ilanngutissavakka. Greenland Business aamma Greenland Venture illoqarfinnut nunaqarfinnullu inuussutissarsiornermut tapiissuteqartoqarsinnaaneranut aaqqissuussinerpassuit pillugit paasisitsiniaallutik angalanissaannik qinnuigissavakka. Takornariat amerliartuinnartut qanoq annertunerpaamik pissarsivigineqarsinnaaneri pillugu Visit Greenland pikkorissaajartorluni angalanissaa aamma pisariaqartinneqarpoq”.
Angalanermi isumaginninnermut peqqissutsimullu tungasut kiisalu pisortaqarfiit akimorlugit suleqatigiittoqartariaqarnera Martha Abelsenimit sammineqarput.

Martha Abelsen ima oqarpoq:
”tikeraakkatsinni tamani utoqqaat atugaat eqqaaneqartarput. Angalaarnitsini malunnarpoq nunaqarfiit inuerukkiarnerat ilutigalugu utoqqaat atugaat unamminartorsiortut, ilinniarsimasunik sulisussaaleqineq kommunimiillu sullissinerit amigaatigineqarlutik”. Martha Abelsen nangilluni oqarpoq: ”utoqqaat oqaluttuaat attortissutigeqaakka. Inuuniarnikkut atukkatik pillugit oqaluttuarnissaminnut utoqqaat pisariaqartitsisut malinnarpoq. Utoqqaat atugaat ataatsimoorluta qanoq pitsanngorsaavigisinnaanerat pillugu angerlaruma piaartumik Borgmester Kiista P. Isaksen attaveqarfigissavara”
Aanngajaarniutinik atornerluinermut kinguaassiuutitsigullu kanngutsaatsuliorfigineqarsimasunullu katsorsaanerit aamma sammineqarput. Meeqqat inuusuttuaqqallu kinguaassiuutitigut kanngutsaatsuliorfigineqarsimasut piaartumik katsorsarneqartalernissaat aammalu aanngajaarniutinik atornerluinerup angerlarsimaffigisamut ilaquttanullu qaninnerusumi ingerlanneqartarnissaa pisariaqartoq Martha Abelsenip isumaqatigilluinnarpai.

Annertunerusumik paasissutissanik aallerfissat:
Inuussutisarsiornermut, Nukissiuuteqarnermut Ilisimatusarnermullu Naalakkersuisoqarfik, e-mail: isiin@nanoq.gl, tlf: 345000.
Isumaginninnermut Inatsisinillu Atuutsitsinermut Naalakkersuisoqarfik, Julie P Wilche, e-mail: jprw@nanoq.gl , tlf: 551190