Ujarassiorit 2019 aallartippoq

Ujarassiorit – nuna tamakkerlugu aatsitassartalinnik ujarassiornermut soqutigisalinnut tamanut unammisitsineq nuannarineqarluartoq – ukiormanna 2019-mut aallartippoq. Ujarassiorit ukioq 1989-imi aallartinneqartoq aasat tamaasa ingerlanneqartarsimavoq.

Akissarsiassat akileraarutitaqanngitsut katillutik 120.000 kroniupput, taakkunanngalu ajugaasup 55.000 kr. pissarsiassarai.

Ujarassiorit Aatsitassanut Sulisoqarnermullu Naalakkersuisoqarfimmiit ingerlanneqarpoq aningaasalersorneqarlunilu. Ajugaasut suliffeqarfinnit aningaasaateqarfinnillu ukunannga akissarsitinneqassapput:

GrønlandsBankip Inuussutissarsiutinut Aningaasaateqarfia A/S aningaasaliisutut pingaarnertut 40.000 koruuninik tapiissuteqarpoq.



Greenland Resources Inc. aamma Greenfields Exploration Ltd aningaasaleeqataasutut tamarmik immikkut 10.000 kroninik tapiissuteqarput.





Internetikkut nittartakkami www.ujarassiorit.gl-imi ujarassiornermut peqataanermut paasissutissat saniasigut aamma downloaderneqarsinnaapput quppersakkat saqqummersitallu allat ujarassiornermi iluaqutaasinnaasut. Assersuutigiinnarlugu atuagaq ”Mineralinik ilitsersuut – Ujarassiuujunngitsunut aatsitassarsiorneq” juulip qaammataani allakkerivinni tamani akeqanngitsumik pineqarsinnaalerumaarput.

Allakkerivimmissaaq pineqarsinnaapput unamminermi peqataasutut nassiussilernermi atugassat aammalu immersugassaq ateq, najukkap il.il. nalunaarsorneqarfissaat. Aamma nunap assinga pissarsiassaavoq, tassanilu nassaarfik nalunaarneqassaaq. Nassiussineq akeqanngilaq.

Ukiormanna Ujarassiorimmut peqataasut nassaavi tiguneqareersimassapput oktoberip aallaqqaataat 2019 nallertinnagu.

Inuussutissarsiutiginagu ujarassiortut Kalaallit Nunaanni inuit allattorsimaffianni nalunaarsorsimasut kisimik peqataasinnaapput. Ujaqqat nunatsinneersut kisimik nassiunneqarsinnaapput. Ujaqqat nassaariffii sukumiisumik aatsaat nalunaarutigineqarpata peqataasut akissarsitinneqarsinnaapput. Karseeqqami ataatsimi nassiunneqartumi taamaallaat ujarak ataaseq nassiunneqassaaq, anginerpaamillu assammit eqeruloorsimasumit anginerussanngilaq, qaarsumiillu ujarak sapinngisamik peerneqarsimassalluni. Ujaqqat nassiussat utertinneqarsinnaanngillat.

Ujarassiorluarisi!

Ujarassiorit ujarassiornerlu pillugu sukumiinerusumik paasisaqarfigineqarsinnaavoq:

Jonas Petersen, Ujarassiooq, Tlf.: +299 34 65 49, e-mail: jpet@nanoq.gl aamma mmr@nanoq.gl

Attavissat allat: Arent Heilmann, Ujarassiooq, Tlf.: +299 34 68 12, E-mail: area@nanoq.gl aamma mmr@nanoq.gl