Ministeriunerup Naalakkersuisullu siulittaasuata ataatsimeeqatigiinnerat

Ministeriuneq Mette Frederiksen aamma Naalakkersuisut Siulittaasuat Kim Kielsen ulloq juulip 12-at 2019 Statsministeriaqarfimmi ataatsimiipput.

Kalaallit Nunaanni meeqqat inuusuttullu sumiginnakkat pillugit danskit oqartussaannik suleqatigiinnerup annertusineqarnissaanik Naalakkersuisut kissaataat aammalu kalaallit meerartaasa 22-usut 1951-imi Danmarkiliartinneqarnerat pillugu oqaluttuarisaanermut tunngasumik qulaajaasoqarnissaa ataatsimiinnermi ilaatigut eqqartorneqarput.

Ministeriuneq Mette Frederiksen ataatsimeereernerup kingorna imatut oqaaseqarpoq:

”Pitsaasumik pissarsiffiulluartumillu ataatsimeeqatigiippugut. Naalagaaffeqatigiinnerup iluani pitsaasumik suleqatigiinnissatta pingaaruteqassusaa isumaqatigiissutigaarput, tassami ajornartorsiutit pingaartitagut  qaqilertarsinnaassagatsigik. Kalaallit Nunaanni meeqqat inuusuttullu sumiginnakkat aamma oqaluttuarisaanermut tunngasumik qulaajaanissap aallartilluarnissaa immikkut pingaartitaraakka. Kalaallit meerartaat pillugit taamaaliortariaqarpugut."

Naalakkersuisut siulittaasuat Kim Kielsen ataatsimeereernerup kingorna imatut oqaaseqarpoq:

”Ataatsimeeqatigiineq pitsaasumik ingerlavoq pissarsiviulluarlunilu, tassanilu siunissami suleqatigiinnissarput eqqartorparput. Meeqqat inuusuttullu sumiginnakkat pillugit unammilligassat susassaqarfiit akimorlugit suleqatigiissitaliornissarput tamatumalu saniatigut oqaluttuarisaanermut tunngasumik qulaajaanissap aallartinneqarnissaa isumaqatigiissutigisinnaagatsigu nuannaarutigeqaara.”

Susassaqarfiit akimorlugit suleqatigiissitassaq Danmarkimeersunit Kalaallit Nunaanneersunillu ilaasortaqartinneqassaaq, suliassallu Kalaallit Nunaannut tunngassuteqartut Isumaginninnermut Inatsisinillu Atuutsitsinermut Naalakkersuisoqarfimmit ataqatigiissarneqassapput.

Oqaluttuarisaanermut tunngasumik qulaajaaneq ilaatigut aqqutigalugu oqaluttuarisaanermi najoqqutarineqarsimasoq aamma qangaanerusoq suliassat unammillernartut assigiinngiiaarnerat, akunnattoornerit aalajangernerillu allaaserineqassapput, minnerunngitsumillu meeqqat inuunerminni atugarisimasaat inuttullu kingunerlutsitsisarsimaneri allaaserineqassallutik.

Isumaginninnermut Nunamilu Namminermi Ministeriaqarfik aammalu Peqqinnissamut Isumaginninnermut Inatsisinillu Atuutsitsinermut Naalakkersuisoqarfik piffissami qaninnerpaami inunnik suliassamut ilisimasalinnik qulaajaasussanik ataatsimoorlutik toqqaassapput, taamaasiornikkut suliaq pilersaarutaareersutut kingusinnerpaamik 1. juni 2020 tunniunneqarsinnaaqqullugu.

Kalaallit meerartaat 22-iusut danskit naalakkersuisuinit utoqqatserfigineqassapput. Taamaattorli Naalakkersuisut paaseqatigalugit isumaqatigiissutigineqarsimasorlu ataqqillugu danskit naalakkersuisuisa qulaajaanissap naammassineqarnissaa utaqqeqqaarniarpaat.

***

Paasissutissat sukumiinerusut:
Statsministeriaqarfimmi attavissaq: Pressesekretær Kristina Mie Hansen, telefon 33 92 22 62.
Naalakkersuisut Siulittaasuta Naalakkersuisoqarfiani attavissaq: Naalakkersuisup allattaa Steve Sandgreen, stev@nanoq.gl, +299 345458