Tasiilami najugaqartut toqqissisimallutik sinissinnaapput

- allaaserisamut ”Siunissami anorersuarujussuit ernummatigigai”-mut, sap. ak. 27-mi Atuagagdliutit/Grønlandsposten-imi saqqummiunneqartumut qisuariaat

Atuagagdliutit/ Grønlandsposten-imi, pingasunngormat juulip pingajuani saqqummersoq malillugu Kommuneqarfik Sermersuumi kommunalbestyrelsimut ilaasortaq Laura Táunâjik isumaqarpoq, Tasiilami illut nutaat piteqqamut pitsaanerusumik illersorneqarnissaat pisariaqartoq. Anorersuarujussuarnerani illut nutaanerusut igalaavi silatimikkut assiaqusersinnaarpasinnginnerat toqqissisimanngissutigaa. Taamaattumik aviisi malillugu ”ingammik illoqarfimmi illut attartortittakkat pitsaanerusumik qajannaarnissaannut” aningaasaliisoqassasoq kommunalbestyrelsimut innersuussutigisimavaa.

Illut piteqqamit ajoquserneqarnissamut qajannaarneqarnissaannut siunnersuut imminermini ajoquteqanngilaq. Naalakkersuisutut, ilaatigut sanaartornermut inatsimmut akisussaasutut ilanngussami matumani erseqqissaatigiinnarusuppara, sanaartornermut malittarisassani Tunumi illut sakkortoorujussuarmik anorlertarneranit (piteqqamik) ulorianartorsiortinneqartarnerat eqqarsaatigineqarsimammat. Taamaattumik malittarisassat malillugit, illut Tasiilami sumiiffinnilu allani sakkortuumik anorlerfiusinnaasuni arlalinni sananeqartut, najukkani anorersuarmut akiuussinnaasunngorlugit nalimmassarneqartarput.

Tasiilami illuliornissamik pilersaarusiornermut innersuussut illoqarfiup akuttunngitsumik piterartarnerani misilittakkat, kiisalu 1970-imi sakkortoorujussuarmik piterarnerani misilittakkat akisunaakkat tunngavigalugit suliarineqarsimavoq.

Igalaanut tamanut tunngatillugu innersuussutigineqarpoq, igalaat angivallaassanngitsut, mikisukkaarlugit agguarneqassasut aammalu immikkut mattussusilikkanik (silittunik) igalaartaqassasut. Aamma igalaat anorlerfiusartup tungaaniittut - tassalu illut silataasa iigaanni avannamut kimmullu sammisut – silataat asserneqarsinnaassapput, teqqaasunit eqqorneqarnissamut illersuuserlugit. Kisiannili igalaaq silarleq mattusuunngorsagaasimappat, minnerpaamillu 4 mm-inik issussuseqarpat silami assiaqutit atunngitsoorneqarsinnaapput (assersuutigalugu assiaqutit illup silataata iigaani, suliarissallugit piuminaalliorfiusuni inissisimappata tamanna atorneqarsinnaavoq).

Tassalu illut attartortittakkat pineqartut pilersaarusiornerini malittarisassat innersuussutillu taakku malinneqarsimappata, illuni najugaqartut toqqissisimallutik sinissinnaasussaapput. Sanaartornermut inatsit naapertorlugu kommunalbestyrelsip sananissamut akuersissuteqarnermini illuliami nutaami malittarisassani aalajangersakkat, sanaartornermut inatsit tunngavigalugu suliarineqartut malinneqarnersut nakkutigisussaavaa.

Sanaartornermi malittarisassat innersuussutillu <www.byginfo.gl> aqqutigalugu pissarsiarineqarsinnaapput.


Inussiarnersumik inuulluaqqusillunga



Karl Frederik Danielsen


Annertunerusumik paasissutissanik pissarsiniarnermi Naalakkersuisup allattaa Anders Samuelsen attavigineqarsinnaavoq uunga allagaqarnikkut e-mail: ansa@nanoq.gl imaluuniit oqarasuaatikkut 290320.