2019-imi kulturimut aningaasaliissutaannik agguaassineq aappassaat

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisup, Ane Lone Baggerip, 2019-imi aappassaaneertumik qinnuteqaateqartitsinermut atatillugu suliniutit assigiinngitsunut 17-nut katillugit 1.507.578,00 koruuninik tapiissutinik agguaassivoq. Aningaasat agguaanneqartut aningaasaliiffinniit tallimaniit ataani pineqartuniit agguaanneqarput.

Kulturimut aningaasaliissutit
Kultureqarnermut aningaasanit suliniutinut assigiinngitsunut tallimanut 300.000 koruuninik tapiissutinik tunniussisoqarpoq, taakkunannga tusarnaartitsinerit assigiinngitsut marluk, isiginnaartitsinerit assigiinngitsut marluk meeqqanullu qalipaaffissamik atuakkamik saqqummersitsineq matussusiivigineqarput. Taakku ilaanni suliniummut Crawford Point: Ice Flow, Deformation & Dance-mut aningaasaliisoqarpoq. Tassani qitittartoq Maliina Jensen, USA-miit qitinnermik ilitsersuisumik kiisalu sermersiooq ilisimatoorlu suleqateqarluni, silaannaap kissatsikkiartorneranik ersersitsiniarlutik Ilulissani sermimi qitilluni filmiliussapput (asseq takuuk: Maliina Jensen, siuliani Tunumi Apusiaajik-mmi qitinnermini filmiliaanit tigulaagaq).

Aningaasat inunnit ataasiakkaanit, kattuffinnit il.il. suliaminnut suliniutiminnullu atatillugu qinnutigineqarsinnaapput, pingaartumillu aningaasarsiutigalugu eqqumiitsuliortut ingerlataannut suliniutaannullu suliniutinullu allanut eqqumiitsuliornikkut qaffasissusilimmik suliaasunut aningaasat tunniunneqarnerusarput.

Filmiliornermik ingerlataqartunut aningaasat
Filmiliornermik ingerlataqartunut aningaasanit filmiliornermik pilersaarutinut tallimanut katillugit 305.000 koruuninik tapiissutinik tunniussisoqarpoq. Aningaasaliivigineqarput filmit assigiinngitsut pingasut, filmi pisimasuinnik tunngavilik kiisalu filmiliaq takinngitsoq. Filmi pisimasuinik tunngavilik “POLARIS” Anorak Film I/S-mit suliarineqartoq aningaasaliivigineqarpoq. Taanna naatsorsuutigineqarpoq 2021-imi takuteqqaarneqarnissaa.

Filmiliornermik ingerlataqartunut aningaasanit kalaallit filmiliornermik pilersaarutaanut tapiissutinik qinnuteqartoqarsinnaavoq, pingaartumik oqaluttualiornernut piviusuliornernullu.

Atuakkat kalaallisoortut
Atuakkanut kalaallisut allatanik tapiissutaasartunit, suliat arfinillit katillugit 304.400 koruuninik agguaassiffigineqarput. Taakkuupput qalipakkanik assilissanillu katersat, taallat, atuakkiortutut saqqummersitseqqaartussat marluk atuakkiaat assigiinngitsut marluk, meeqqanut atuakkiaq ilinniutertalik kiisalu Kalaallit Atuakkiortut Nuummi oktoberip qaammataani 2019-imi meeqqat atuakkiortuinik pikkorissaanissamut meeqqanullu atuakkiornermut tunngasunik sammisassaqartitsinissaminnut aningaasaliivigineqarput.

Kulturimik sulialinnut aningaasaliissutit
Taakkua qaavisigut kulturimik sulialinnut qaammammut agguaanneqartartut 22.000 koruunnit eqqumiitsuliornikkut suliaqartunut marlunnut agguaanneqarput, katillugit qaammatit 14-nut aningaasartuutissatut. Taakkuupput Kalaallit Nunaanni assiliisuni siullersaap assilisaanik katersanik atuakkamik saqqummersitsisussaq kiisalu ukiup tulliani 2020-imi eqqumiitsuliortup Ane Lena Fussing Rosbachip pinngortitap ilusaannik qalipakkanik saqqummersitsisussaq (asseq takuuk).

Eqqumiitsuliortunut timersornermik aaqqissuussanut angalanerit
Timersoqatigiiffiit Kalaallit Nunaanni Timersoqatigiit Kattuffiannut ilaasortat 2018-ip naajartornerani timersornermik aaqqissuussaminni, eqqumiitsuliortunik suleqateqarnerminni, eqqumiitsuliortut angalanissaannut aningaasartuutissaannik tapiissuteqarsinnaanngorput. Maannalu tapiissutinik qinnuteqartut marluk nipilersortartunik tusarnaartitsinissaminnut tapertipput katillugit 176.900 koruuninik. Tassunga atatillugu assammik arsartartut peqatigiiffii Nuummeersut, NÛK aamma GSS, nipilersortartoq Bonnie Tyler septemberimi Nuummi tusarnaartitsinissaanut aaqqissuussaannut aningaasanik tapiiffigineqarput.


Suliat aningaasaliiffigitittut allattorsimaffiat uani aaneqarsinnaapput.

Qinnuteqarnissap tullianut piffissaliussaq ulloq kingulleq tassaavoq 1. september 2019. Namminersorlutik Oqartussaniit Kulturimut aningaasaliissutit pillugit sukumiinerusumik paasissutissanik pissarsiniartoqarsinnaavoq nittartakkakkut www.sullissivik.gl -ikkut

Paasisaqarnerorusukkaanni, attavigineqarsinnaavoq AC-fuldmægtig Uiloq Mathæussen, Ilinniartitaanermut, Kultureqarnermut Ilageeqarnermullu Naalakkersuisoqarfik, Toqq. +299345741, uilm@nanoq.gl