Meeqqanut inuusuttunullu suliassaqarfimmik pitsanngorsaanissaq anguniarneqarpoq

Ukiuni kingullerni meeqqat inuusuttullu atugarisaasa pitsanngorsarnissaat siunertaralugu suliniutinik arlalinnik Namminersorlutik Oqartussat kommunillu aallartitsisimapput. Peqqissutsimut, Isumaginninnermut Inatsisinillu Atuutsitsinermut Naalakkersuisup Martha Abelsenip danskit social- og indenrigsministeriannik Astrid Kragimik aamma justitsministeriannik Nick Hækkerupimik ippassaq ataatsimeeqateqarnera, meeqqanut inuusuttunullu suliassaqarfimmi pitsanngorsaanissamut alloriaqqinnertut isigineqassaaq.

Naalakkersuisut aamma Inatsisartut ukiuni kingullerni nakkutilliinermik patajaallisaaneq aamma Isumaginninnermut Aqutsisoqarfimmik pilersitsineq qulakkeersimavaat, meeqqat tapersersorneqarnissaannut inatsit akuerisimallugu, kiisalu meeqqanut inuusuttunullu suliassaqarfimmik pitsanngoriaanissaq siunertaralugu aningaasaliissutit annertusisimallugit. Pitsanngoriaatit meeqqat sumiginnagaannginnissaannik atornerlunneqannginnissaannillu qulakkeerinninnissamut alloriarnerupput.

Ippassaq Naalakkersuisup Martha Abelsenip danskit Social- og Indenrigsministeeriaqarfianni aamma Justitsministeeriaqarfianni ministerinik nutaanik ataatsimeeqateqarnerani, danskit oqartussaasui qanoq ilillutik Namminersorlutik Oqartussat suleqatigalugit siunissamut isigaluni suliassaqarfiup ineriartortinnissaanut ikiuussinnaanersut ilapittusinnaanersullu ataatsimeeqataasut eqqartorpaat. Erseqqissumik Naalakkersuisut uku siunnersuutigisimavaat:
  • Sulianut tunngasutigut sulisut, sulianik suliarinninnermi kommuninut ikiuuttussat, aamma kommunini sulianik suliarinnittartunik sanileralugit ilitsersuineq.
  • Sulianut tunngasutigut sulisut katsorsaanermi ikiuussinnaasut
  • Danmarkimi suliffeqarfiit arlallit suleqatiginerannik patajaallisaaneq, taamaalilluni neqeroorutit katsorsaanermillu suliniutit patajaallisarniarlugit, aamma Kalaallit Nunaanni periarfissanik piginnaasanillu pitsanngorsaaneq qulakkeerniarlugu
  • Suliniuteqarneq, meeqqanik atornerluisoqarnermi, pinngitsaaliilluni atoqateqartoqarsimatillugu aamma persuttaasoqarsimatillugu imaluunniit taakku pillugit pasitsaassisoqarsimappat taakku pillugit suliani sukkasuumik iliuuseqartoqartartoq innuttaasut misiginiassammassuk
  • Pineqaatissiinermi sinaakkutinik atulersitsineq
  • Eqqunngitsuliortartut pillarneqarneranni inooqataanikkut akuulersitseqqiisumik katsorsaaneq kiisalu eqqugaasut inatsiseqartitsinikkut inissisimanerannik patajaallisaaneq
Piffissaq ungasinnerusoq isigalugu aaqqiissutissanik pilersitsinissamut atatillugu, danskit ministeeriaqarfii amerlanerit oqaloqatiginissaat pisariaqartinneqarpoq. Naalakkersuisut taamaattumik kissaatigaat, danskinik/kalaallinik inuttalimmik atituumik suleqatigiiliortoqassasoq, tassanilu Kalaallit Nunaanni kommunit peqataassapput. Suleqatigiit siunissaq ungasinnerusoq isigalugu Danmarkip Kalaallit Nunaat qanoq ililluni Tasiilami Kalaallillu Nunaata sinnerani meeqqat atugaat pillugit ikiuisinnaanera pillugu kaammattuuteqassaaq.

”Siunissami suleqatigiinnissarput pillugu danskit ministeriinik pitsaasumik oqaloqatiginnittoqarsimavoq. Oqartussaqarfitta akornanni qanimut suleqatigiinnerput ingerlatiinnassagipput isumaqatigiittoqarpoq. Ministerit marluullutik Kalaallit Nunaat siunissaq isigalugu sulianut tunngasutigut tapersersorniarlugu kissaateqarnertik oqaatigaat. Kissaatigisavut taakku danskit ministeriinit tusaatissatut tiguneqarput, kingusinnerusukkullu tamanut pitsaanerpaamik qanoq aaqqiissuteqarsinnaanerup ujartornissaanut illuatungeriilluni oqaloqatigiinnissaq ingerlanneqassaaq” Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq.

Danskit oqartussaasuinut saaffiginnissummut peqatigitillugu ilaatigut satspuljet tunngavigalugit suliniutinik aamma justitspuljenimik piviusunngortitsineq pillugit danskit oqartussaasuinik suleqateqarnermik maanna ingerlanneqartumik Naalakkersuisut nangitsissapput.

Meeqqat inuusuttullu pillugit suliniutit pilertornerusumik ingerlanneqartarnissaat Naalakkersuisut aammattaaq sulissutigaat, aamma Naalakkersuisut meeqqat inuusuttullu sumiginnagaasut ikilisinniarlugit iliuusissatut pilersaarutip saqqummiunnissaa, inuiaqatigiit peqqinnissaat pillugu suliniuteqarneq meeqqanik inuusuttunillu ukkatarinnittoq kiisalu ukiaru 2019-imi ilaqutariit politikkiat saqqummiutissallugit suli pilersaarutigaat.

”Neriuppunga suliniutit aallartinneqareersimasut, piffissaq sivikinnerusoq sivisunerusorlu isigalugit pitsanngorsaatissat pillugit Danmarkimut saaffiginninneq aamma Naalakkersuisut suliniutit allat pillugit pilersaarutaasa meeqqanut inuusuttunullu suliassaqarfiup pisariaqartinneqarluinnartumik tapersersorneqarnissaanik qulakkerinnikkumaartut” Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq.

Paasisaqarnerorusukkuit naalakkersuisoqarfiup pisortaa Julie Præst Wilche attavigiuk, e-mail: jprw@nanoq.gl imaluunniit oqarasuaat + 299 551190