Uunga akissut: Jens Napatoq

Blomst

Peqqissutsimut Naalakkersuisoq Martha Abelsen-imik

Peqqinnissaqarfik

Inatsisartunut ilaasortaq Jens Napatoq Naalakkersuisunut ammasumik allakkamini peqqinnissaqarfik Naalakkersuisullu pillugit tunngavissaqanngitsumik uparuaavoq oqaaseqarfigisariaqartutut misigisannik.
Aallarniutigalugu oqaatigissavara Naalakkersuisut soorunalimi piaaralutik inukillisaaniarlutik uukapaatitsinngimmata.
Peqqinnissaqarfik Ittoqqortoormiini nakorsamut atorfik pillugu ingerlaavartumik allagarsiunneqarpoq. Ullumikkumut Ittoqqortoormiini atorfimmut allagarsiussisoqarpoq, ajoraluartumilli massakkumut qinnuteqartoqarsimanngilaq.
Taamatuttaaq atorfiit allat Peqqinnissaqarfiup inuttassarsiorlugit allagarsiuppai, taakku suliffissarsiortarfinni assigiinngitsuni, ilaatigut Peqqinnissaqarfiup nittartagaatigut Gjob.gl-ikkut kiisalu internetikkut attaveqaqatigiittarfitsigut nittarsaanneqartarput. Sulisoqarnermut siunnersortit Peqqinnissaqarfiullu sinniisai suliffiit pillugit saqqummersitsivinni naleqquttuni peqataasarlutillu sulisorineqalersinnaasut ussagartinniarlugit Peqqinnissaqarfik pillugu paasititsiniaallutik ataatsimiisitsisarput.

Peqqinnissaqarfiup nukippassuit atorlugit ilaatigut nakorsanik sulisussarsiortarpoq, nunatsinnili nakorsanut atorfinnut piumasaqaatinik eqqortitsisut qinnuteqartut massakkumut killilerujussuupput. Nakorsat amerlanersaat attaveqaqatigisartakkat imaluunniit nakorsat nunatsinniissimasut aqqutigalugit sulisussarsiarineqartarput.
Isumaqarpunga, JN akerlianik, peqqinnissaqarfiup allaffissornikkut nukippassuit sulisussarsiornermut atortarai.
Sulisussarsiornikkut sutigut tamatigut unammillerneqartuarneq pissutigalugu ass. sulisoqarnermut tunngatillugu allannguutit peqqinnissaqarfimmit aalajangiiffigineqartuartarput taamaattumillu suliassamik isumaginnittarneq qanoq naleqqunnerpaamik aaqqissorneqassanersoq ukkatarineqartariaqarluni. Pingaartumik nakorsat suleriaasiat ineriartupiloorpoq immikkullu paasisimasaqarnissaq ukkatarineqarnerujartuinnarluni, tamatumani nakorsat piginnaanermikkut malinnaasinnaajumallutik immikkut piginnaasanik iliuuserineqakulasariaqartunik suleqatillu peqatigalugit eqqartorneqakulasariaqartunik ineriartortitsisarput. Tamanna peqqinnissaqarfiup nakorsanik nakorsaanermik nalinginnaasumik piginnaasaqarfilinnik amerlanerusunik atorfinitsitsiniarneranik ajornakusuulersitsivoq.

Peqqinnissaqarfiup nakorsat taartaasut piffissami sivikitsumi atorfinitsittariaqartarmagit akilikkatsinnut naapertuuttumik pitsaasumik sullinneqartarnersugut misissorneqartariaqarlunilu eqqartorneqartariaqarpoq, aamma aaqqiissutaasinnaasut allat eqqartorneqartariaqarput. Taamaakkaluartoq peqqinnissaqarfimmi aningaasaqarnikkut tunngavissiat uagut taakkununnga aalangersakkavut atugaralugit sulisut ullut tamaasa suliarisartagaat pillugit ataqqilluinnarakkit oqaatigerusuppara.

Qulaani eqqaaneqartunut ilanngullugu eqqaarusuppara nunap immikkoortuinut agguluinerup kingorna ukiut qulit ingerlareerneranni sullissineq pillugu allakkiaq pissutsinut naleqqussarneqarniassammat nutarsarneqarnissaa Naalakkersuisut aallartisarmassuk. Ilinniagaqassutsikkut imminut illersorsinnaasumik suliassat aalajangersimasut qanoq sumilu ingerlanneqartassanersut pilersaarusiorneqartariaqarput, peqqinnissaqarfiullu qanoq sullissisinnaanera innuttaasunut ersarinnerusariaqarpoq. Tamatumani aalajangiusimavara soqutigisaqaqatigiit susassallit, tassunga ilanngullugit Inatsisartut, kommunit, NGO-t innuttaasullu peqqinnissaqarfimmut naatsorsuutinik eqqartuinermut akuliutitinneqarnissaat.

Paasisaqarnerujumallutit attavigiuk naalakkersuisoqarfimmi pisortaq Tine Pars oqarasuaatikkut.: +299 34 66 25 imaluunniit e-mailikkut: tine@nanoq.gl