Tusarniaanermut piffissaliussap sivittorneqarnera

Uuliamut gassimullu periusissiap (2019-2023) allaqqaarnera piffissami 23. maj 2019-imit 14. juni 2019-ip tungaanut tusarniaassutaasimavoq. Tusarniaanerup nalaata sivikippallaarsimanera tusarniaanermut akissutini arlalinni nalunaarutaasimavoq.

Inuussutissarsiornermut, Nukissiuuteqarnermut Ilisimatusarnermullu Naalakkersuisoq Jess Svane oqarpoq:

”Tusarniaanermut ingerlassamut siunertaq tassaavoq periusissiatsialammut ilapittuuteqarnissamut kissaateqartut tamaasa ilanngunnissaat. Siunnersuutinik arlalinnik pissarsiareersimanerput nuannaarutigaara, taakkulu ilaanniippoq tusarniaanermut piffissarititap sivisunerusup kissaatiginera.

Taamaattumik tusarniaanermut akissuteqaatiminnik suliaqarnissamut kikkut tamarmik naammattumik piffissaqassallutik misigisimassammata tusarniaanerup nalaa 31. august 2019-imut sivitsornissaa aalajangiutereerpara.”

Paasissutissat erseqqinnerusut uunga saaffiginnillutit pissarsiarisinnaavatit: Inuussutissarsiornermut, Nukissiuuteqarnermut Ilisimatusarnermullu Naalakkersuisoqarfiup e-mailia: ISIIN@nanoq.gl, oqarasuaat: 345000.