Nunatsinni Peqqinnissaqarfiup aaqqissugaanera

Aqqaluaq B Egede ulloq 27. juni 2019-imi peqqinnissaqarfimmi pissutsit arlallit pillugit tusagassiorfinnut nalunaarummi oqaaseqaateqarpoq oqaaseqarfigerusutannik.
Siullermik peqqinnissaqarfitsinnut atatillugu suut naatsorsuutigissanerlugit aaqqissuussaanerlu qanoq ittuussanersoq pillugu Inatsisartunit tamarmiusunit oqallisigineqarnissaa eqqarsaatigalugu arsaq milorujunnikuusara Aqqaluaq B Egedemit akorluarneqarmat nuannaarutigaara.
Unammilligatsinnut malinnaasinnaasumik aammalu napparsimasut innuttaasullu sapinngisamik pitsaanerpaamik isumagineqarsinnaallutik peqqinnissaqarfeqarnissarput pingaaruteqarpoq. Aammali sulisut aningaasallu peqqinnissaqarfimmut tunniutissallugit toqqakkagut eqqarsaatigalugit piviusunngortinneqarsinnaanngitsunik anguniagaqannginnissarput aamma pingaaruteqarpoq. Pisariaqartinneqartunik sulisoqarnissarput pingaaruteqarluinnarpoq, isertuussinnanngilarpullu tamannarpiaq eqqarsaatigalugu peqqinnissaqarfik annertuumik tatineqarmat, tamannalu taartaasartunik atuineq pissutigalugu aningaasartuutit annertuallaarnerannut pissutaaqataalluni.

Sulisussarsiortarnermi annertuumik unammilligassaqarneq peqqinnissaqarfiup ingerlatsiviini atorfinnut tamanut atuuppoq. Nunatsinni nunattalu avataani ilinniartitaanernut peqqissutsimut sulianut attuumassuteqartunut qinnuteqartartut ajoraluartumik ikileriarujussuarput. Taamaalilluni assersuutigalugu kalaallit Danmarkimi nakorsatut ilinniartut quliinnaapput, ukiut qulit matuma siornagut 30-t missaanniittaraluarlutik. Nunatsinni meeqqat atuarfiata ilinniartitaanerullu ingerlallualersinnissaat politikikkut ataatsimut suliassaraarput, aatsaat taamaaliorutta sulisussanik pisariaqartinneqartunik ilinniagalinnik oqaaseqartunillu ilinniartitsisinnaallutalu sulisussarsisinnaalissaagut.

Aqqaluaq B Egede allappoq katsorsaanerit qitiusumut inissinnerisigut innuttaasut isummannaatsumik inissisimanissaat ajorseriaateqartoq sulisullu sipaarniarfigineqartut. Oqaatigineqartut taakku marluk akerlilerusuppakka. Peqqinnissaqarfimmik qitiusoqarfinnut iluarsaaqqinnerup aammalu sinitsitsisarnerup, pilattaasarnerup sullississutillu allat qitiusumut inissinneqarnerisa akornanni imminut ataqatigiittoqanngilaq.
Peqqinnissaqarfimmik iluarsaaqqinnikkut peqqissaaveqarfinni sulisut suliamik aqutsinermillu ilisimasaqartunit qitiusumiittunit tapersersorneqarnissaat qulakkeerneqarpoq. Peqqinnissakkut sulianik ilisimasaqarfiit, pitsaassuseq napparsimasullu isumannaatsuunissaat qulakkeerniarlugu katsorsaanerit ernisarfiillu qitiusumut inissinneqarput. Ajorluartumilli ilumoorpoq piffissami sivikitsuinnarmi atorfinitsitsisarnerit amerlammata, tamatumalu nassatarisaanik sulisut annertuumik taarseraattarmata, tamatuma kingunerisinnaallugu aallarussisarnerit amerlinerat. Taamaaliortoqarporli napparsimasup sapinngisamik pitsaanerpaamik passunneqarnissaa qulakkeerniarlugu.
Aqqaluaq B Egede allappoq nunani allani peqqinnissaqarfimmik aaqqissuussisarnerannut sanilliullugu peqqinnissaqarfik kinguariaateqarsimasoq, oqaatiginaguli tamanna sutigut qanoq pinersoq. Uanga isumaqarpunga nunatsinni nuttartariaaseq malillugu peqqinnissaqarfik sapinngisamik pitsaanerpaamik aaqqissuunneqartoq, ungasianit nakorsiartitsissut telemedicinip atortullu nutaaliat atorneqarnerat siuarsimasorujussuuvoq aammalu suliassat aningaasaqarnikkut killissarititat iluanni ingerlanneqartut.

Siusinnerusukkut neriorsuinittut peqqinnissaqarfitsinnut qanoq naatsorsuutiginnissanerluta aammalu aaqqissuussineq qanoq ittoq kissaatigineripput pillugit Inatsisartunik soqutigisaqaqatigiinnillu allanik oqaloqateqarusuppunga. Taamaattumillu Inatsisartut tulliani ataatsimiinnissaannut atatillugu ilaasortat isumasioqatigiinnissamut aggersarniarpakka oqaloqatigiinnissarpullu assut qilanaaralugu.

Paasisaqarnerujumallutit attavigiuk naalakkersuisoqarfimmi pisortaq Tine Pars oqarasuaatikkut.: +299 34 66 25 imaluunniit e-mailikkut: tine@nanoq.gl