Aggustimi 2020-mi kujataani aatsitassarsiornermik saqqummersitsineq

Naluneqanngitsutut ukiut allortarlugit Kalaallit Nunaanni nuannaarutaasaqisumik tamanullu iluaqutaasaqisumik aalisarnermut saqqummersitsineq ingerlanneqartarpoq.
Maanna Naalakkersuisut Kalaallit Nunaanni aatsitassanik saqqummersitsisarnermik aallartitsinissamik suliniuteqalerput, taamaaliornikkut aatsitassarsiortuni soqutiginninneq siuariartornerlu suli annertunerusumik ineriartornerusinnaaqqullugit, malitsigisaanillu nunarput nutaanik isertitaqarsinnaaqqullugu.
Innuttaasut Kalaallit Nunaanni aatsitassarsiornermik soqutiginninnerisa annertusiartornerat pissutigalugu, aammalu aatsitassarsiornermik inuussutissarsiortunut akuunerulersinneqarnissaat siunertat ilagivaat.
Taamaammat Aatsitassarsiornermut Suliffeqarnermullu Naalakkersuisoq Erik Jensen aggustimi 2020-mi kujataani Kalaallit Nunaanni aatsitassarsiornermik saqqummersitsinermik siullermik ingerlatsinissamut pilersaarusiorpoq.
Aatsitassarsiornermi ingerlataqartut assigiinngitsut amerlasuut peqataanissaat paasissutissanillu agguaassaqarnissaat anguniagaavoq. Saqqummersitsinerullu nalaani aamma sammisat aalajangersimasut ataasiakkaat pillugit sammisaqartoqartassaaq, peqataasut innuttaasullu paasisaqarfigerusutaat inissaqartitsinniarlugu.
Piffissami aggersumi attuumassuteqartut, soorlu Aatsitassanut Suliffeqarnermullu Naalakkersuisoqarfik, Kommune Kujalleq, sulisoqarnermi illuatungeriit (Sulisitsisut & SIK), piffimmi namminersortut ingerlataqartut/siunnersuisooqatigiit kiisalu piffimmi aatsitassarsiortitseqatigiiffiit aatsitassarsiornermik ingerlataqartut saqqummersitsineq sapinngisamik soqutiginarnerusinnaaqqullugu suleqatigiillutik sukumiinerusumik pilersaarusiussapput.

Naalakkersuisoqarfiup pisortaa Jørgen T. Hammeken-Holm, +299 346846, e-mail: joeh@nanoq.gl attavigalugu paasissutissanik erseqqinnerusunik pissarsisoqarsinnaavoq.