Helene Risagerimut eqqaaniut

Aliasuutigeqisatsinnik, Helene Risagerip arfininngornermi 29. juni toqukkut qimagunnera pillugu nalunaarut tiguarput.

Helene tusagassiuteqarnerup silarsuaani ukiut 35-it sinnerlugit sulisimavoq. Radiokkullu aallakaatitassiornermik suliaqalersimalluni 1964-imi, suliaminillu aallutaqarsimalluni 90-ikkut aallarternerat ilanngullugu. Radiomi suliaqarnermut tunniusimalluaqqinnaarluni aallussinikuuvoq pinngitsooranilu Kalaallit Nunaata Radioata ineriarorneranut ullumikkullu KNR-ip inissisimalerfigisimasaanut annertuumik sunniuteqarsimassalluni.

Radiomi immikkut sulisitaalluni meeqqanut aallakaatitassiortutut aallartippoq, tamatumalu malitsigisaanik tunniusimalluarnerata mikrofoniatalu sumiiffinnut radiop najunnissaanut pisariaqartitsiffini nunatsinni sumi tamanut nassarnikuuvaa.

Radiop senerissami immikkoortortaqarfeqalernera, immikkoortorqarfik avannaa, qeqqa, kujataatullu ilisimaneqarnerusut Helenep aallarnisaaqataaffigisimavai. Aaqqissuussineq taamanikkut naalaartartunut piffinni ataasiakkaani pisunut malinnaatitsillunilu innuttaasunut attaveqaqatigiinnerulersitsisoq.

Naalakkersuisut sinnerlugit Helenep ilaqutai misiginneqatigaakka

Helenep annertuumik suliaqarsimanini eqqaamaneqaatigissavaa.

Helenep eqqaaneqarnera ataqqinartuuli.

Naalakkersuisut sinnerlugit, Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq.


Ane Lone Bagger