Nunatta ilinniakkaminnik naammassisuinut qujanaq

Naalakkersuisut sinnerlugit aamma Ilinniartitaanermut, Kultureqarnermut Ilageeqarnermullu Naalakkersuisutut ulluni makkunani ilinniarfinni tamani ilinniakkaminnik naammassisut tamaasa pilluaqqujumavakka – ilinniarnertuunngorniarfinni, inuutissarsiutinik ilinniarfinni imaluunniit ingerlaqqiffiusumik ilinniarfinni, Nunatsinni imaluunniit nunani allani. Pilluangaaritsi.

Ilinniagaqarneq tassaavoq inuttut ajugaaneq annertooq, apeqqutaatinnagu toqqaannartumik ilinniarluni ingerlasimaneq imaluunniit aqqutaani unamminartoqarsimanera. Ilinniakkap naammassineranut uppernasaatitaarniarnermi piumasaavoq nukissaqarluarnissaq, piumassuseqarnissaq sulilluarnissarlu. Tamannalu ilinniakkamik naammassisutut ilissi sapernagu uppernarsarparsi. Angusaqarumassusersi suliamullu tunniusimanersi pillugit qujavunga.

Ulluni kingulliunerusuni nuannaarutigisannik ilasi arlaqartut aamma ilaqutaat ikinngutaallu nuannaartut naapittarpakka. Nuannaartut tulluusimaarlutillu. Ilinniarnerup siunissamut matu ammartarpaa – ataasiakkaanut aamma Nunatsinnut. Amerliartuinnartut ilinniagaqartalerput, siunissarpullu eqqarsaatigalugu neriulluarlungalu nuannaalersarpunga, nuannaarnersi sapiissuseqarnersilu takugaagakkit.

Glenn Møllerip, Nuummi GUX-imi ilinniarnertuunngortup naammasseqatiminut oqalugiarnermini taalliortoq Kristen Poulsen issuarpaa: ”Anguniagaqartoq sorsugassaqartaraaq” oqarlunilu:
”Aamma qujamasuutigaarput nunatta periarfississimammatigut ilinniaqqinnissamut piareersarnitsinni maani periarfississimammatigut.”

Uagut inuiaqatigiittut aammattaaq qujamasuutigaarput, assasi isaallugit ilinniarnissamut periarfissaq akuersaarsimagassiuk. Akisussaafimmik tigusinersi qujassutigaarput, siunissatta qaamasuunissaa anguniarlugu aqqutaani unamminarumaartut qaangerniarnerat ataatsimoorutissagatsigu. Nunatta ineriartornissaanut isumalluutaavusi pisariaqartut pingaaruteqarluinnartullu.

Ilinniaqqissagussi imaluunniit suliffeqarfinni sulilissagussi, Nunatsinni nunaniluunniit allani tulluusimaarutigaatsigit.

Inussiarnersumik inuulluaqqusillunga

Ane Lone Bagger

Erseqqinnerusunik paasisarniaruit ministerip allattaa Rosa Thorsen e-mail una atorlugu saaffigiuk: rosath@nanoq.gl