2019-mi Nanortalimmi aalisartup kapisillip meqqia pinnassutigivaa

Nuannaarutigissavara suliniaqatigiiffik NASCO sinnerlugu, aamma Aalisarnermut, Piniarnermut Nunalerinermullu Naalakkersuisutut, aalisartoq Ole Simonsen, nanortalimmiu, NASCO-p ukiumoortumik makitsinikkut nersornaasiuttagaanik aningaasanillu ullumi juunip 24-anni tunisinnaagakku, taama Aalisarnermut, Piniarnermut Nunalerinermullu Naalakkersuisoq Jens Immanuelsen nersornaammik aningaasanillu Nanortalimmiitilluni oqarpoq.

Ole Simonsen Nanortallip eqqaani, NAFO 1F-mi, kapisilinniartilluni kapisilimmik meqqilimmik septembarip 19-ianni 2018-imi pisaqarpoq. Kapisilik Labradorip kuuisa ilaanni Hunt Riverimi 2018-imi meqqilerneqarsimavoq. Meqqialu Pinngortitaleriffimmut 2018-mi nassiussimavaa.

NASCO-p kapisilinnut allagartaq akissarsissutigitittagaa 1.000 pund sterlinginik aningaasartalik ilinnut tunniussinnaagakku nuannaarutigivara. Taakku koruuninngorlugit 8.350-it missaanniipput. Pilluakutsoorillu.
Ilanngullugu nalunaarutigisinnaavara NASCO-p præsidentiata Johannes Vitalesip aamma pilluaqqorujussuarmatit. Ole Simonsen kapisillip meqqianik akissarsinneqaravit ilaquttatillu aamma pilluakutsooritsi – aasarsiorluarisilu.
Ilanngullugu ilisimatitsissutigineqarsinnaavoq Ole Simonsen 2011-mi aamma makitaalluni allagartamik aningaasanillu tunineqarmat.

Kapisilinnut nalunaaqutsiunneqartartut pisoqalineq ajorput, qangalili pisaasimasut nalunaaqutaat allaat nassiunneqarsinnaasarlutik. Meqqit nutaanerusut aamma nutaannginnerusut Pinngortitaleriffimmut nassiunneqartarlutik.

NASCO

NASCO tassaavoq nunat naalakkersuisuisa suleqatigiiffiat, kapisilinnik Altantikup avannarpasissuaniittunik peqartuaannarnissaanik suliniaqatigiiffiat, kapisileqatigiit qularnaatsumik aqutsinikkut piujuaannaqqullugit suliniaqatigiiffiusoq.
NASCO-p Atlantikup avannarpasissuani kapisileqartuarnissaanik suliaqarnerminut ilanngussimavaa kapisillit nalunaaqutsersortarlugit. Suliniaqatigiiffiullu tamaani najugallit kajumissaarpai kapisilinnik nalunaaqutalinnik siumugaqarsimagunik, taakku nassiuttassagaat sumi qangalu pisaasimaneri ilanngullugit ilisimatitsissutigineqarlutik. Taamaalilluni kapisillit nuuttarneri tamatumuunakkut ilisimasaqarfiginerulissammata.

Nunatsinni kinaluunniit nalunaaqutalimmik kapisilittoq, pisarisami nalunaaqutaa Pinngortitaleriffimmut nassiussinnaavaa. Pinngortitaleriffiup nalunaaqutaq NASCO-mut nassiuttarpaa, suliniaqatigiiffillu ukiut tamaasa ataatsimiinnermini nalunaaquttanik nassiunneqarsimasunik makitsisarpoq, makinneqartoq 1.000 pund sterlinginik aningaasartalinnik akissarsisinneqartarluni.

Attavigineqarsinnaavoq John Biilmann, AC-fuldmægtig, Aalisarnermut, Piniarnermut Nunalerinermullu Naalakkersuisoqarfik. E-mail: johb@nanoq.gl