Soraarummeersortavut pilluarujussuarlik



Allattoq: Martha Abelsen, Peqqissutsimut, Isumaginninnermut Inatsisinillu Atuutsitsinermut Naalakkersuisoq


Bacheloritut kandidatitullu ulluni makkunani ilinniarnerminnik naammassinnillutik soraarummeertut Naalakkersuisut sinnerlugit pilluaqqorusuppakka. Pingaartumik peqqissutsimut isumaginninnermullu Naalakkersuisutut nuannaarutigaara isumaginninnikkut peqqissutsikkullu sullissinermi naammassisut tamaasa pilluaqqusinnaagakkit. Peqqinnissaqarfiup isumaginnittoqarfiullu iluani sutigut tamatigut ilissi ilinniarsimasutut pisinnaasasi assut pisariaqartinneqarput.

Soorunalimi pisoq ilissinnut annertullunilu pingaaruteqarpoq. Qularnanngitsumik aamma ulloq ilaquttassinnut pingaartorsiorfiuvoq. Kisianni aamma nunatsinnut ulloq pingaaruteqarpoq. Inuiaqatitsinnut, napparsimasunut innuttaasunullu ataasiakkaanut ulluinnarni ilissinnik naapitsisunut ilinniarsimasutullu ilisimasassinnik piginnaasassinnillu iluaqutiginnittunut, isumalluutaavusi pisariaqartut pingaaruteqartullu.

Tiimerpassuit atuareerlusi, oqalugiartunut tusarnaareerlusi misilitsereerlusilu maanna ilinniarsimanermut uppernarsaatisi pivasi kapitalilu nutaaq aallartissinnaanngorlugu. Ilikkarsimasasi suliffissinni atortussanngorpasi. Tapersersuisinnaassallusilu inuk tamarmiusoq takusinnaasussaavarsi aamma ilaqutaasut qanigisaasullu akuliutitissinnaassallugit. Taamaaliorumallusi ilisimasaqarluartariaqarlusilu isumatusaarsinnaasariaqarlusilu iliuuseqapallassinnaasariaqarpusi. Susassaqarfimmi pingaaruteqarluinnartumi sulisussanngorpusi, tamatumani inuup peqqissusaa, atugarissaarnera toqqissisimaneralu qitiusussaavoq.

Neriuppunga ilikkakkassi atornissaannut qilanaartusi. Uagut sumi suliffittaarnissarsi apeqqutaatinnagu tikilluaqqunissassinnut qilanaarpugut. Siunissami suliffissassinni ajunnginnerpaamik kissaappassi. Aammaarlunga ilinniarsimasunngornissinnik pilluaqquassi!

Paasisaqarnerujumallutit attavigiuk naalakkersuisup allattaa Inger Heilmann Larsen e-mailikkut: ihla@nanoq.gl imaluunniit oqarasuaatikkut + 299 554160