Itillimi aamma Sarfannguani innuttaasunik ataatsimiititsinerit

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Bagger aamma Aatsitassanut Suliffeqarnermullu Naalakkersuisoq Erik Jensen Itillimut Sarfannguanullu 23. juni tikeraarput.

Marluullutik ornigarneqarluartunik uummaarissumillu ingerlanneqartunik innuttaasunik ataatsimiisitsinerit Itillimi aamma Sarfannguani ingerlanneqarput innuttaasut Ane Lone Bagger-imut aamma Erik Jensen-imullu apeqquteqartarlutik.

Qulequttat sammineqartut apeqqutigineqartartullu innuttaasuniit assigiinngittarput, nunaqarfinnilu inuunermi unammilligassanut tunngasarlutik, nunaqarfinnimi suliffissaaleqisoqarlunilu inissaaleqisoqarsinnaasarmat.

Nunaqarfinni takornariartitsisarnermik ineriartortitsinissamut pilersaarusiat ujartorneqarput, qinnutigineqarporlu Itillimi oqaluffiup takornariartunut soqutiginartutut ammarneqarnissaa.

Nunaqarfinni timelærerinut ilinniarsimanngitsunut piginnaasatigut annertusaasoqarnissaa ujartorneqarpoq, nunaqarfimmi meeqqat atuartitaanerat pitsaanerulersinnaaqqullugu.

Itillimi Oqaluffik, Atuarfik aamma meeqqerivik ulloq unnuarlu ingerlatsiviusoq Pilutaq pulaarneqarput, Sarfannguanilu Atuarfik, Oqaluffik aamma aalisakkerivik Naalakkersuisunut ilaasortanit pulaarneqarlutik.

Atuarfiit marluk pineqartut atuakkamik "Kalaallit Nunaata geologiia - angalaarit" Naalakkersuisunit saqqummersinneqartumik tunissuteqarfigineqarput.