Ane Lone Baggerip borgmester Malik Berthelsen naapippaa

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Bagger aamma Qeqqata Kommuniani Borgmesteri Malik Berthelsen marlunngormat oqaloqatigiipput. Tassani ilaatigut ilinniartitaanermut tunngasuni Naalakkersuisut pilersaarutaat pillugit borgmesteri ilisimatinneqarpoq.

Ilinniartitaanermut pilersaarut II qanittumi saqqummissaaq tassanilu ullumikkumut naleqqiullugu ilinniartitaanikkut aaqqissuussinermik eqaannerusumik ataqatigiinnerusumillu pilersitsinissamik anguniagaqartoq nalilersuinermik aamma ineriartortitsinermik sulianut sulinerup ilaatigut ingerlatiinnarnissaa Naalakkersuisunit saqqummiunneqasalluni. Nalilersuinermik aamma ineriartortitsinermik assersuutigalugu kikkut tamarmik qanoq inuusuttutut ilinniagaqalersinnaanerat kommuninilu ataasiakkaani ilinniarfinnik pilersitsisinnaaneq aallunneqassaaq. Maskinmesteritut ilinniartitaanermik aallartitsinissamik pilersaarutit kiisalu aasaru aalisakkerinermi allagartartaarluni ingeriøritut ilinniartitaanerup aallartinneqarnissaa borgmesterimit tigulluarneqarput, aamma ilinniartut ineqarfii pillugit maannakkut Naalakkersuisut pilersaarutaannik tusagaqarnini nuannaarutigalugu. Ilinniartut ineqarfii pillugit Naalakkersuisut ingerlataqarfimmi pilersaarutaat junip aallartinnerani saqqummerpoq tassanilu takuneqarsinnaalluni ingerlataqarfimmi pilersaarutip immikkoortuani siullermi Sisimiuni 72-inik siniffinnik inissaqartumik ilinniartut ineqarfii amerlineqarnissaanik pisariaqartitsisoqarallartoq.

Tamatuma saniatigut Ane Lone Bagger KTI-Sisimiut allineqarnissaanut periarfissanik misissuilluni sulinerup aallartissimanera pillugu ilisimatitsivoq. KTI-Sisimiut allineqarnissaanut Naalakkersuisut siunertaat tassaavoq KTI’mi ingerlatat katersornerisigut Sisimiuni ilinniarfeqarfiit nukittuut pilersinneqarnissaat taamaalillunilu ilinniartitaanikkut sammiviit akornanni annertuunik ingerlatsinermi sunniutinik pilersitsisoqarluni.

Taakku saniatigut kommunimi perorsaasutigut inissisimaneq pillugu borgmesteri ilaatigut Naalakkersuisumut ilisimatitsivoq. Kommuni maannakkut perorsaasunik 27-inik amigaateqarpoq. Borgmesteri Malik Berthelsen aamma ilisimatitsivoq meeqqerivinni isumaginninnermut siunnersortinik atorfinitsitsiniarluni kommuni suliaqartoq, taamaalilluni innuttaasuni ajornartorsiutaasinnaasut siusinnerusukkut paasineqarsinnaallutik tamatumalu kingorna suli atualinngitsuni pitsaaliuinerit ingerlanneqarsinnaallutik.

Ataatsimut isigalugu kinguneqarluartumik oqaloqatigiittoqarpoq, Sisimiuni ilinniarnikkut avatangiisit suli annertunerusumik nukittorsaaffigineqassappata ulluunerani paaqqinnittarfinni inissatigut qulakkeerinermut atatillugu suleqatigiinnissamut piumassuseqarneq pillugu kommuni ilisimatitsilluni.