Nunarput namminersulivissaaq – tamatta pisussaaffeqarlutalu akisussaaffeqarpugut

All.: Kim Kielsen, Naalakkersuisut Siulittaasuat

“Nunatta Namminersorluni Oqartussaanermut ikaarsaarneraniit ullumikkut juunip 21-ani ukiut qulinngorput.

Namminersorluni Oqartussaaneq tassaavoq ukiut ingerlaneranni Landsrådiusimasut, Inatsisartuni ilaasortaasimasut Naalakkersuisuusarsimasullu tamarmik nunatta nammineerneruleriartornissaanik  siunertaqarlutik manna tikillugu angusimasaat. Ornitarpulli suli tikinngilarput.

Namminersorluni Oqartussaanerup qulinngortorsiornera aallarnerfigalugu siunissami alloriaqqinnissarput eqqarsaatigalugu anguniagassavut pillugit inuiaqatigiiulluta eqqartuisarnitsinnut tamattalu akisussaaffimmik tiguseqataalluta iliuuseqarfigisariaqakkatta suunerinik nalilersuisarnerput pimoorunnerullugu aallutilertariaqarparput. Anguniagassatsinni pingaarnerit ilagaat innuttaasugut tamatta akisussaaqataanitsinnik suleqataasariaqarnitsinnillu aalajangiussinissarput, piginnaanngorsarnissarpullu.

Oqartussaaffiit suli Danmarkimiit oqartussaaffigineqartut nammineerneruleriartornerput malillugu nunatsinnut nuunneqartussat suli amerlaqaat. Matumani pingaaruteqarpoq oqartussaaffiit nuunneqarpata nunatsinni innuttaasut namminneerlutik suliassanik kivitsisinnaanissaat. Angusassarmi suussava oqartussaaffiit nuunniaannarlugit nuunneqarpata – tamatumalu malitsigisaanik nunatta avataaniit sulisussarsiortarneq suli ullumikkornit annerulersinneqarpat? Isumaliutigisassat nalilersorluagassallu amerlaqaat.

Taamaattumik oqartussaaffinnik tigusiartuaarnissarput sukataarunneqanngippallaartutut uparuarneqartaraluartoq eqqaamasariaqarparput oqartussaaffinnik tigusiniaannarluta tigooqqaassagutta aamma eqqarsaatigisariaqaratsigu tamanna innuttaaqatitta malinnaaffigisinnaassaneraat.

Nunatsinni Namminersorluni Oqartussaaneq quliliivoq. Ukiullu makku atukkavut tassaapput meeqqat ukiui. Nunatsinni innuttaasugut tamatta anguniagarisariaqararput inuusuttut meeqqallu nukittuut nangitsisuujumaarnissaat.

Inuiaqatigiinni ajornartorsiutit annertuut inuiaqatigiittut sanngeeqqutigiunnaassagutsigit tamatta iliuuseqaqataasariaqarpugut. Nunatsinni namminersulivissimasumi suliassat innuttaasut naammattumik suliarisinnaassappatigit sulisinnaassuseq ilinniarsimassuserlu qaffassartariaqarparput.

Ukiuni Namminersornerulluni Oqartussaanerup atuutilerneraniit nunatsinni sorpassuartigut pitsaasumik ineriartortitsisoqarsimavoq. Ilinniartitaaneq eqqarsaatigiinnarlugu nunatsinni ilinniagaqarnissamut periarfissat amerlinikooqaat, attaveqaatitigut annertuumik ineriartortitsisoqarsimavoq, oqartussaaffiit arlallit nammineerluta akisussaaffigalugit ingerlatilersimavagut. Angusat amerlaqaat, anguniagaqartuarnerlu suli ingerlassaaq.

Qanortoq maanna inersisimasuusugut meeqqanik inuusuttunillu nukittuunik nangitsisussaqarnitta toqqammavissinneqarnissaa sapinngisarput atorlugu tamatta peqataaffigitigu. Tamassi inuiattut ullorsiornitsinni – Namminersorlunilu Oqartussaanerup atuutsilerneraniit ukiut qulinngorneranni qamannga pisumik pilluaritsi!