Inuiattut ullorsiornermi 21. juni meeqqanut atuakkat kalaallisut nutaat saqqummersinneqassapput



Meeqqanut atuakkat kalaallit oqaasii kulturiallu aallaavigalugit suliat amigaataaqaat. Inuiattut ullorsiornermi 21. juni meeqqanut atuakkat kalaallisuut sisamat angajoqqaanut atuagartallit saqqummersinneqassapput. Martha Abelsen, Isumaginninnermut naalakkersuisoq oqaluttuarpoq: ”Nuannaarutigaarput Namminersornerup ukiunik qulinngortorsiornera eqqorpiarlugu atuakkat saqqummersinneqarmata. Tamanna meerartatta siunissamik piginnittuunerannut ilisarnaqutaavoq. Meeqqanut atuakkat aqqutigalugit ilaqutariit ulluinnarnut qanittunik atortussaqalissapput, neriuppungalu meeqqat angajoqqaallu ataatsimoorlutik nuannaarutigiumaaraat. Meeqqanut atuakkat meeqqat oqaasiinik ineriartortitsiinnaratik, aammali ilaqutariinni imminut qanillinermik nuannaarnermillu pilersitseqataasinnaapput. Isumassarsiaq Kalaallit Nunaanni juumuunit, sundhedsplejerskinit perorsaasunillu saqqummiunneqaqqaarpoq – meeqqanut atuakkianik ujartuisunit. Tulluusimaarutigaara meeqqat angajoqqaallu pisariaqartitaasa piviusunngortinnissaannut peqataasinnaagama”.

Atuakkiortoq Miiannguaq Olsvig atuakkat ataatsimoortut pillugit takorluukkaminik oqaluttuarpoq: ”Meeqqanut atuakkani ilisaritinneqarput niviarsiaraq Manumina ilaqutaalu. Uannut pingaartuuvoq Manuminamik meeqqanut atuakkiat nuannersuullutillu ulluinnarnut qanittuunissaat, tassuunakkut meeqqat imminnut ilisarisinnaaqqullugit. Meeqqat 2-3-nik ukiullit tupinnaannavittarput, namminneq silarsuaqarlutik, neriuppungalu meeqqanut atuakkat aqqutigalugit tamanna paasineqalerumaartoq”. Titartaasartoq Christian Rex Nuummeersoq, quianartumik paasinnilluarlunilu atuakkiat silarsuaannik qalipaatigissaartumik ilusilersuivoq.

Ullumikkut kalaallit ulluinnarisaat qitiutinneqarpoq
Sammisarisat ’ataatsimoorluni piffissaq siulleq’, ’misigissutsit’, ’napparsimaneq’ aamma ’sinik’ kalaallit immikkut ilisimasallit qanimut suleqatigalugit toqqagaapput, taakku misigisarmata qulequtarineqartut tassaasut ilaqutariit mikisunik meerartallit pingaartittagaat. Camilla Brandi Anshøj, John Andersen aamma Else Guldager ’God Barndom’-mimeersut aamma Rikke Louise Kuhn Nunatsinni MANU*-meersoq suliamik aallarnisaasuupput, oqaluttuarlutillu: ”Atuakkat meeqqat mikisut ilisarisinnaasaat amigaataaqaat. Taamaammat pingaartuuvoq kalaallisut eqqarsarluni atuakkat allanneqarnerat. Oqaatsit Kalaallit Nunaanni meeqqanut naapertuuttuupput kaammattuutaasussaallutillu, apeqqutaatinnagu angajoqqaat kalaallisut, qallunaatut taakkuluunniit akuleriisillugit oqaluttuunerat.”

Atuakkat silarsuaat tupinnartoq nutaaliorluni ammaanneqarpoq
Saqqummersitat sisamat aqqutigalugit atuakkat silarsuaat tupinnartoq ilaqutariinnut mikisunik meerartalinnut, meeqqat inuuneranni siusissukkut, ammaanneqarpoq. Else Guldager oqarpoq: ”Meeqqat atuagaat siulleq siaartitertagaavoq, Kalaallit Nunaanni angajoqqaanngorlaanut tamanut meeqqap inunngornerani tunniunneqartartussaq. Tamanna siunissamut eqqanaarineruvoq.”
Atuakkat Kalaallit Nunaanni sulisut immikkut ilisimasallit assigiinngitsut qanimut suleqatigalugit suliarineqarput, taakkualu ilisimasaminnik misilittakkaminnillu tapiissuteqartuupput, aammattaarlu angajoqqaat peqataatinneqarput. Rikke Louise Kuhn oqaluttuarpoq: ”Pingaartissimavarput nunamit tamarmik isummersuisoqarnissaa, arlallit Skype aqqutigalugu peqataasarput. Workshoppernermi atuakkat ataasiakkaat isikkussaanniit imarititassanut sukumiisumik oqallisigineqarput. Nutaanik isumassarsisoqartarpoq, malitsigisaanik suliarineqartunik. Maanna atuakkat atortussiallu nunamut tamarmut nassiussuunnissaat qilanaaraarput.”
John Andersen naggasiivoq: ”Qulequttat ulluinnarnut tunngasut sammineqarsinnaasut suli amerlaqaat. Takorloorparput meeqqanut atuakkat suli amerlanerit suliarisinnaallugit, Kalaallit Nunaanni meeqqat mikinerit ilaqutaasalu iluaqutigisinnaasaat.”

Suliniut Kalaallit Nunaanni Danmarkimilu tapersersorluarneqarpoq, aningaasaliiffigineqarlunilu MANU-mit Pinaveersaartitsinermut Isumaginninnermullu Aqutsisoqarfimmit aamma Den grønlandske fondimit aamma God Barndom-mimit. Kiisalu Rotary Danmarkimi Rotary distrikt-imeersoq, Kalaallit Nunaannullu attuumassuteqartoq aammattaaq suliniutip piviusunngornissaata qularnaarnissaanut annertuumik aningaasaliivoq.

Meeqqanut atuakkat pillugit Nunatsinni saaffissaq:
Rikke Louise Kuhn +299 58 30 71
Leise Raarup + 34 42 63

Atuakkanik allaaserinninniarluni piniarfissaq: God Barndom: eg@god-barndom.dk.
* MANU tassaavoq nalinginnaasumik angajoqqaanik pikkorissaaneq, Kalaallit Nunaanni angajoqqaanut tamanut, naartulernermiit meeqqap 4-nik ukioqalerneranut neqeroorutaasartoq. Manu.gl annertunerusumik paasisassarsiorfiusinnaavoq.