Danmarkimi nasalakkersuisunngortitsisoqarnissaannut Naalakkersuisut piareersimapput

Naalakkersuisut Danmarkimi naalakkersuisunngortitsinissaq utaqqivaat, pisortatigoortumik naalakkersuisunngortitsisoqartinnagu susassaqarfinni assigiinngitsuni ministerit saaffiginnissutiinut isummertoqarsinnaanngimmat

Martha Abelsenip ikiuiniarnera kigaappallaarnerarlugu KNR-imi ulloq 19. juuni 2019 allaaserisami Ilaqutariinnermut Peqqissutsimullu Ataatsimiititaliami siulittaasup tulliata IA-lu sinnerlugu Inatsisartunut ilaasortap Stina Egedep oqaatigaa Danmarkimi naalakkersuisunngortitsinissaq utaqqisinnaanagu. Danmarkimi oqartussanik suleqateqarnermi suleriutsit pillugit paatsoornerusoqaqqunagu Naalakkersuisut erseqqissaartigerusuppaat Danmarkimi naalakkersuisunngortitsisoqartinnagu Danmarkimi oqartussat saaffiginnissutinut isummernavianngitsut.

Danmarkimi naalakkersuisunngortitsisoqarnissaata tungaanut Danmarkip naalagaaffianut saaffiginnissutissap imarisassaanik kissaatit kommunit peqatigalugit ataqatigiissarnissaannut Naalakkersuisut piffissaq atorpaat.

Naalakkersuisoq Martha Abelsen sapaatip akunnerata matuma siorna Qeqertalik Kommunemi angalanermut atorpaa, kommunalebestyrelsep Naalakkersuisullu qanoq ikiorserneqarusunnerannik kissaataat illoqarfinni nunaqarfinnilu susassaqarfimmik suliaqartut oqaloqatiginerisigut tusarusullugit. Angalanermut atatillugu borgemesteri Palle Jeremiassen aamma borgemesteri Ane Hansen ataatsimeeqatigineqarputtaaq. Aammattaaq borgmesterit tamarmik ataatsimeeqatigineqassapput kommunit akisussaaffimmi iluanni kissaataat pillugit. Kommunit pisariaqarsorisatik aallaavigalugit kissaateqarsinnaapput Namminersorlutik Oqartussanit Danmarkip naalagaaffianilluunniit qanoq ikiorneqarnissartik pillugu.

Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq: ”Danmarkip naalagaaffianut saaffiginninnissama septembarimut utaqqissunnissaa eqqarsaatigisimagaluarpara. Tusagassiortunik ulloq 12. juuni 2019 katersortitsinermi ilisimatitsissutigivara Danmarkip naalagaaffianut saaffiginnissuteqarnissamut Inatsisartut aalajangernerat pingaartillugu, Danmarkimilu naalakkersuisunngortitsisoqarniariarpat Københavniliarniarlunga meeqqanut inuusuttunullu tunngasutigut ikiorserneqarnissamik kissaateqariartorlunga. Naalakkersuisut peqquneqarnerattut saaffiginnissutinut qinersisoqarneranut atatillugu naalakkersuisuugallartut isummernavianngimmata piffissaq atorluarpara kommunit susassaqarfimminnik isumaginnilluarsinnaanissaminnut pisariaqartitaannut sapinngisamik naapertuuttunik ersarissunik kissaateqarsinnaaniassagama”.

Peqatigitillugu meeqqat inuusuttullu ilumut iliuuseqartoqarneranik misigisaqarnissaat siuenertaralugu meeqqanut inuusuttunullu iliuuserineqartut sorliit tuavisaarneqarsinnaanersut Naalakkersuisut nalilersuipput.
Danmarkimi naalakkersuisunngortitsisoqarnissaata tungaanut suliniutit ingerlaartut Naalakkersuisut ingerlatiinnarpaat aammattaaq Danmarkimi oqartussaaffinnik Naalakkersuisut suleqateqarnertik ingerlatiinnarlugu, soorlu ikiorsiissutit aningaasaliissutaasussat pillugit.

Paasisaqarnerorusuttut attavigisinnaavaat Naalakkersuisumut allatsi Inger Heilmann Larsen e-mail: ihla@nanoq.gl imaluunniit oqarasuaat: + 299 554160