Avatangiisinut malittarisassat tunngavigalugit aatsitassarsiornermi sulianut tunngasumik periusissiap allakkiarineqarnera 2019-2023



Aatsitassanut Suliassaqarfinnut Avatangiisinut Aqutsisoqarfiup periusissap allakkiarineqarnera sapaatip akunnerini arfineq pingasuni ullumikkut ulloq aallarnerfigalugu tusarniaassutigaa.

Aatsitassanut periusissiaq kingulleq 2014-2018 ilutigalugu aatsitassanut suliassaqarfinni avatangiisinut oqartussaaffinnut aammalu akuersissutinut aalajangersakkat immikkoortinneqarnissaat suliarisimavaa. Aatsitassanut suliat avatangiisinut atugassarititaasa allaffissornikkut isumagineqarnerat maanna Pinngortitamut Avangiisinullu Naalakkersuisoqarfiup ataani Aatsitassanut Suliassaqarfinnut Avatangiisinut Aqutsisoqarfimmit isumagineqalerpoq.

2019-miit 2023-mut piffissami periusissiarineqartumi aatsitassarsiorluni assaalinnginnermi aammalu matoreernerata kingorna Aatsitassanut Suliassaqarfinnut Avatangiisinut Aqutsisoqarfiup aammaarluni avatangiisinik innimiginninnissap ukkatarineqarnissaa pingaartippaa.

2019-miit 2023-mut aatsitassanut periusissiami avatangiisit
Avatangiisinut aqutsisoqarfiup 2019-miit 2023-mut periusissiamut allakkiamini Kalaallit Nunaanni nunap qaavani immamilu avatangiisinut-, pinngortitamut – kiisalu silaannaap pissusaanut nalimmassakkanik malittarisassaliorneq ineriartortitsinermi anguniagassatut sammivaa.

Periusissiamut allakkiami aatsitassarsiornermi inatsit aallaavigineqarpoq – matumani suliniutit tamarmik avatangiisinik innimiginnilluni – kiisalu nunat tamalaani periuutsimut pitsaasumut akuerisamullu naapertuuttumik illersorneqarsinnaasumillu sulinissaq anguniarlugu.

Aallartinnginnermi matoreernermilu avatangiisinik innimiginninninneq
Periusissiamut allakkiami pingaarnertut anguniagaq tassaavoq, Avatangiisinut aqutsisoqarfiup suliassaqarfiit assigiinngitsut aammalu ineriartortitsinissami anguniagaasut ilutigalugit, suliffeqarfinnut aatsitassarsiortuusunut sapinngisamik piffissaq siusinnerpaaq atorlugu suliap pinngortinneraniilli matunissaanut avatangiisinik innimiginninnissaq eqqummaariffigilertinniarlugu.

Avatangiisinut sunniutaasut katillugit – pinngortitami ataqatigiissaarinermik ingerlatsivik
Periusissiamut allakkiaq avatangiisinut ingerlatsiviup pinngortitami ataqatigiissakkamik ingerlaaseqarluni ingerlatsiviusunngoriartornissaanut aallarnisaavoq, matumani piffiit aalajangersimasut aatsitassarsiorfinnit aammalu allatigut suliaqarfinnit qanoq annertutigisumik sunnertissimanerat takuneqarsinnaalersissallugu – avatangiisinut sunniutaasut katillugit.

Ujarassiornermut aammalu uuliamut-/gasimullu suliassaqarfinnut avatangiisinut inatsisit malitsigiit marluk
Ujarassiornermi suliassaqarfinnut, annikitsumik aatsitassarsiornermik akuersissutaatilinnut, kiisalu kulbrintenik suliassaqarfinnut Aatsitassanut oqartussaanerit aatsitassarsiornermut immikkut ittunik inatsisinik tulleriittunik inatsisiliornissamik pilersaaruteqarput. Taamaattumik periusissiap allakkiarinerani aatsitassarsiornermik suliaqarnermi avatangiisinut atugassarititat namminersuutigineqarnerullutik isumagineqartarnissaat ineriartortinnerujumallugu inatsisinik marlunnik namminersuutigineqarnerusunik avatangiisini aatsitassarsiornermut tunngasunik inatsisiliornissamik anguniakkanittaaq imaqarpoq – avatangiisinut inatsit sakkussiassanut manngertunut tunngasoq ataaseq, aammalu avatangiisinut inatsit uuliamut- gasimullu suliassaqarfinnut tunngasoq ataaseq.

Ammasuuneq, suleqatigiinneq kiisalu attaveqaqatigiinneq
Avatangiisinut aqutsisoqarfiup aatsitassarsiornermik suliaqarnermi ineriartortitsinermut soqutigisallit assigiinngitsut pitsaasumik ataqqeqatigiittumillu suleqatiginissaat kissaatigaa. Taamaasilluni ammasumik, tunngavilersorluakkamik aammalu kinguneqarluartussamik suleqataasut akornanni oqaloqatigiissinnaaneq naatsorsuutigineqarsinnaalissammat. Tamannalu angusinnaajumallugu Avatangiisinut aqutsisoqarfiup ammasuuneq, suleqatigiissinnaaneq aammalu attaveqaqatigiinneq qitiusumik suliniutitut anguniagaraa.

Avatangiisinut malittarisassat tunngavigalugit aatsitassarsiornermi sulianut tunngasumik periusissiap allakkiarineqarnerata 2019-2023 tusarniaassutigineqarnerani Aatsitassanut Suliassaqarfinnut Avatangiisinut Aqutsisoqarfiup kikkut tamat soqutiginnittut tusarniaanermut akissuteqaatisiffiginissaat kissaatigaa. Tusarniaanermi paasissutissat Naalakkersuisut tusarniaavianni takuneqarsinnaapput https://naalakkersuisut.gl/kl-GL/Tusarniaanerit tusarniaanermullu akissuteqaatit Avatangiisinut Aqutsisoqarfimmut eamra@nanoq.gl kingusinnerpaamik 19. August 2019 nassiunneqassapput.

Paasisaqarnerorusukkuit Aqutsisoqarfiup pisortaa Najaaraq Demant-Poort attavigiuk tlf. 346838 email: nasd@nanoq.gl



Assitaliussaq 1: Anguniarneqartut ineriartortitsinermilu anguniagassat aatsitassarsiornermi killiffigineqartartut assigiinngitsut tunngavigalugit inississugaapput: misissuineq misissueqqaartoqannginneralu sioqqullugit – misissuinermit piiaanermut ikaarsaarnermi – aatsitassanik piiaasoqalerpat – matoreerpallu kingorna. Ammalortuliap qeqqaniittut tassaapput killiffinni tamani anguniarneqartut.