Naalakkersuisuni ilaasortat pingasut Qeqertarsuup Tunuani siunissaq pillugu innuttaasunik ataatsimeeqateqarput

Sapaatip akunnerata siuliani Inuussutissarsiornermut, Nukissiuuteqarnermut Ilisimatusarnermullu Naalakkersuisoq Jess Svane, Ineqarnermut Attaveqaqatigiinnermullu Naalakkersuisoq Karl Frederik Danielsen, aamma Peqqissutsimut, Isumaginninnermut, Inatsisinillu Atuutsitsinermut Naalakkersuisoq Martha Abelsen Ilulissanut, Qasigiannguanut, Qeqertarsuarnut, Aasiannut, Kangaatsiamut, Attumut, Akunnaamut, Kitsissuarsunnut aamma Ikamiunut tikeraarput.

Angalaarnermut siunertaq tassaasimavoq inuussutissarsiorfinni periarfissanik toqqissisimanartunik sinaakkutissaqarsinnaanissaq, toqqissisimanartunik pitsaasunillu ineqarnermut tunngasutigut atugaqarnissamut, kiisalu minnerunngitsumik qanoq peqatigiilluta innuttaasunut sinaakkuteqarnissamut pilersissinnaanissaat pillugit oqaloqateqarnissaq.

Ilaatigut takornariartitsinerup, nunami tunngavilimmik tunisassiornerup, imermik imigassamik avammut nioqquteqarnerup, aallartisaasarnerup allarpassuillu iluini inuutissarsiorfiit suliffissallu nutaat ineriartortinnissaannut Naalakkersuisoq Jess Svane-ip saqqummiuppai.

Jess Svane oqarpoq: ”Inuussutissarsiorfinnut tapiissuteqartarnermik aaqqiissutit sunniuteqarluartumik iluaqutiginerisigut qanoq ililluta siunissami siuarsarnermik suliffinnillu pilersitsinissatsinnut, minnerunngitsumillu inuutissarsiorfinnut agguaassassat koruunit 220 mio.-nut isumaliutigilluakkanik apeqquterpassuarnik siunnersuuterpassuarnillu pissarsisimavunga. Sumiiffinni amerlasuuni takornariartitsinermik suliffeqarfiit pinngortiterineri takullugit qiimmallannartuuvoq. Sumiiffinni amerlasuuni akunnittarfiliornerit pilersaarutigineqarlutillu nutaanik sanaartortoqarniarpoq, takornariartitsinermilu suliarisassat nutaat ineriartortinneqarput, taakku pinngortitatsinnik assissaqanngitsumik nittarsaassissallutik.
- Aamma 2030-mi 100 %-imik nukissiornermik minguitsumik anguniakkap qanoq ilinikkut tikinnissaanut siunnersuutitsialappassuaqartoqarnera nuannaraara.”
Jess Svanep ilannguppaa.

Karl Frederik Danielsen oqarpoq: ”Qeqertarsuup Tunuani illoqarfinnut nunaqarfinnullu angalaarnitsinni innuttaasut naapinneri uannut assut nuannersimavoq. Innuttaasunik ataatsimiisitsinerni ilaatigut inissialiornissamut, sanaartorfigeqatigalugit illulianut aamma piginneqatigiilluni inissianut innuttaasut taarsigassarsiornissamut periarfissatsialaat pillugit ilisimatitsinissaq pingaartissimavara. Illoqarfinni mikinerusuni inissialiornernut taarsigassarsianik annertunerusunik nassataqartitsisunik nutaanik inatsisinik takkuttoqarsimavoq. Tassunga ilanngullugu inissianik iluarsaassinissamut taarsigassarsiniartoqarsinnaalerpoq. Ingammik pensionisialinnut taarsigassarsinissamut periarfissanik pitsaasunik peqalerpoq. Ineqarneq pillugu iluarsaasseqqinnermi innuttaasut siunissami sumiiffimmut ataasiinnarmut saaffiginnissinnaalernissaat pingaartinneqarsimavoq: tassalu kommunimi. Taamaalilluni innuttaasunut qaninnerusumik kiffartuussiffeqalersinnaavoq.”

Meeqqanik inuusuttunillu sulissaqarfiup, innarluutilinnik suliassaqarfiup aamma pinaveersaarinermik suliaqarnerit iluini Naalakkersuisut pilersaarutaannik Martha Abelsen saqqummiussivoq, soorlulusooq siunissami peqqissusermut tunngatillugu pilersaarutinik suliaqarneq eqqartorlugu.

Martha Abelsen oqarpoq: ”Nunap immikkoortuini peqqinnissaqarfinnik takusaqarneq, aammalu iluatsittut tamaviaarfiusullu pillugit tusagaqarneq assut uannut tunniussaqarsimapput. Aammattaaq ulluni nunatsinni meeqqanut inuusuttunullu pissutsinik assut sammisaqarfiusuni kommunip meeqqanik inuusuttunillu suliassaqarfigisaminnut anguniagai pillugit tusagaqarneq assut pissarsiviuvoq. Innuttaasunut ataasiakkaanut aamma ilaqutariinnut assut iluaqutaasumik sammisanik akimortumik kommunip suliaqarnera nersualaarusuppara. Isumaginninnermik suliassaqarfimmi tamaviaarfissanut kommunip naapitseriaasia nunatsinni meeqqanut inuusuttunullu pissutsinik pitsanngorsaaniarlutik Naalakkersuisut suliaqaqqinnerannut qularnanngilluinnartumik isumassarsisitsisinnaavoq.”

Qaammatini takkuttussani nunap ilaani allani oqaloqateqarniarluni angalanissanik Naalakkersuisut pilersaaruteqarput.

Annertunerusumik ilisimatitsissutit pillugit attavigikkit:
Inuussutissarsiornermut, Nukissiuuteqarnermut Ilisimatusarnermullu Naalakkersuisoqarfik, oq. 34 50 00, e-mail: isiin@nanoq.gl
Ineqarnermut Attaveqaqatigiinnermullu Naalakkersuisoqarfik, oq. 34 50 00, e-mail: box909@nanoq.gl
Peqqissutsimut Naalakkersuisoqarfik, oq. 34 50 00, e-mail: ihla@nanoq.gl
Isumaginninnermut Inatsisinillu Atuutsitsinermut Naalakkersuisoqarfik, oq. 34 50 00, e-mail: ihla@nanoq.gl