Aqutsinermi tunngavissat pillugit isummernissamut tunngavissiaq Aalisarneq pillugu Ataatsimiititaliarsuarmit takkutilerpoq

2019-imi juunip ulluisa 18-ianni aamma 19-ianni Aalisarneq pillugu Ataatsimiititaliarsuaq aappassaanik ataatsimiippoq. Inuiaqatigiit aalisakkanik qalerualinnillu ataatsimut isumalluutaannik atorluaanerunissaat siunertaralugu aamma piffissaq ungasinnerusoq eqqarsaatigalugu Kalaallit Nunaata aalisakkatigut isumalluutiminik pitsaanerpaamik qanoq aqutsisinnaanera pillugu apeqqutit pingaarutillit ataatsimiinnermi pitsaasumik tigussaasumillu oqaluuserineqarput.

 

Tamanna tunngavigalugu oqallissaarut annertooq pisassiissutit aalajangersarneqartarnerannut pisassallu aqunneqarnissaannut pilersaarutit atuutsinneqalernissaannut kiisalu aningaasatigut aqutsinissamut siunnersuutitalik Aalisarneq pillugu Ataatsimiititaliarsuup piareersarlugu suliarivaa.

 

Tamatumani siunertarineqarpoq ilaatigut kinguaariit tulliuttut pisaqarluartarnissaat qulakkeerniarlugu naleqquttunik tunngavissinneqarnissaat ilaatigullu naammassisaqarsinnaassutip atuutereersup atorluarneqarnissaanut pitsaasumik periarfissiinissaq kiisalu ullumikkut aalisarnermik ingerlatsisut inuussutissarsiutaasa ineriartortinneqarnissaat siunertaralugu siumut isigisumik aningaasaliissuteqarnissaq pilersaarusiorneqassaaq.

 

Oqallissaarut 2019-imi ukiap ingerlanerani saqqummiunneqassasoq naatsorsuutigineqarpoq. Tassunga tunngatillugu Ataatsimiititaliarsuup siulittaasuata Jens Paulsenip oqaatigaa: ”Aalisarneq pillugu Ataatsimiititaliarsuup oqallissaaruteqarnermini anguniarpaa tunngaviusumik periusissat pillugit politikerinik innuttaasunillu qanimut oqaloqateqarnissaq, tamannalu pissaaq saqqummiinerup kingunitsiannguatigut”.

 

Aamma tamanna tunngavigalugu Aalisarneq pillugu Ataatsimiititaliarsuaq ilaatigut isumalluutinik agguaassisarneq, tulaassisussaaneq, nutaaliorneq, piginnaanngorsaaneq il.il. pillugit apeqqutinut tunngassuteqartunik isumaliutissiissutimi suliaralugu ingerlateqqinnissaanut tunngavissaqarlualissaaq.

 

Inaarutaasumik isumaliutissiissutip 2020-p qiteqqunerani naammassineqarnissaa naatsorsuutigineqarpoq.

 

Paasissutissanik matumani taaneqanngitsunik allanik pissarserusuttoqarpat Aalisarnermut Ataatsimiititaliarsuup siulittaasua, Jens Paulsen, jp@alg.gl  aqqutigalugu  saaffigineqarsinnaavoq.