Nipilersornermik nuannisartitsineq, Kalaallit Nunaannit Islandimiillu misigisassat

Kalaallit Nunaata Reykjavikimi sinniisoqarfiata Kalaallit Nunaata Inuiattut ullorsiornissaat junip 16-ani annertuumik kateriisitsinikkut malunnartippaat, tassanilu klassisk operamik pop-imillu seqinnarissuarmi avatangiiserissaartumilu nuannivissumik ingerlanneqarput.

Qiimaneq pitsaanerpaaffissaminiippoq, Erfalasorpullu kusanaqaluni Reykjavikimi Avannaamioqatigiit Illuata silataani erfappoq, Kalaallit Nunaata Inuiattut Ullorsiornissaanut Avannaamioqatigiit Illu atukkiussimavaat kalaallit ullorsiorneranni atugassanngorlugu. Reykjavikimi nalliuttorsiornissap ingerlannissaa pisariaqavissumik sapaammi junip 16-ani ingerlanneqarnissaa toqqarneqarsimavoq. 

Inatsisartut Siulittaasuata Vivian Motzfeldtip aamma Reykjavikimi Kalaallit Nunaata Sinniisoqarfiani pisortap Jacob Isbosethsenip najuuttut tikilluaqquaat, Siulittaasullu ersarissarpaa Kalaallit Nunaanni inuiattut ullorsiortarnerput immikkuullarissunik ileqqulersorfiusartoq, ilaatigut ullortunersiortoqartarpoq, tassunga atatillugu inuusaaserput immikkuullarissoq naleqqussarneqarpoq ullortuneq kisiat nalliuttorsiutigissanagu, aammali ullukinneq, qaamanerup kingumut uteriartulernera decemberip 21-ani nalliuttorsiutigisarlutigu. 

Taassuma saniatigut najuuttut nassuiaanneqarput inuiattut ullorsiornerup nalliussinerani ulluni tulliuttuni pisussat pillugit, ullorsiornermilu ullaakkut erinarsoqattaarnerit, oqalugiarnerit, erfalasumik amusinerit, kaffillernerit, kalaaliminertuunnerit taamatullu nipilersornermik, qitinnermik, qaannamik takutitsinerit minnerunngitsumillu puisinniutsitsinerit nuna tamakkerlugu ingerlanneqartarlutik. 

Kalaallit Nunaata Inuiattut Ullorsiornera malunnartinniarlugu Reykjavikimi peqataasinnaagama assut nuannaarpunga. Nunanut sanilitsinnut qaninnernut qanimut attaveqarnerup ingerlatiinnarnissaa pingaaruteqarpoq – Islandimuinnaanngitsoq Nunalli Avannarliit Killiit tamaasa eqqarsaatigalugit. Nuannerpoq nunaqqaterpassuavut tamaani najugaqalersimasut Islandimilu ingerlalluartut ilassillugit, pingaaruteqarporlu tamatuma politikkikkut akuerinissaa, ilutigalugulu sinniisoqarfipput peqatigalugu sumiiffitsinni nioqqutissiat ataatsimoorluta nittarsaannissaat” taama oqaaseqarpoq Inatsiartut Siulittaasuat Vivian Motzfeldt.

Aaqqissuussineq tamanut ammasuuvoq akeqaranilu, nuqqativut Islandimi najugaqalersimasut, nunat aallartitaqarfiineersut taamatullu islandermiut politikkikkut, niuernikkut ilaqutaqarnikkulluunnit Kalaallit Nunaannut attuumassutillit inuit 100 missaanniittut takkussimapput.

Malitsigisaanik kusanarluinnartumik kusassaasoqarsimavoq, nerisassatigullu immikkuullarissut soorlu tuttu pujuugaq, umimmak, savamillu pølsiliaq Kamimmeersut, raajat Royal Greenlandimeersut aammalu immiaaqqat ussigassat Godthåb Bryghusimeersut najuuttunut tamanut sassaalliutigineqarput, najuuttunit nuannaarutaaqisumik, illaqattaartoqarluni, oqaloqatigiittoqarluni attaveqaqatigiinnissamut allagartanik paarlaasseqatigiinnertalimmik. 

Erinarsortartoq Josef Lund Josefsen erinarsuutit nipilersuutillu kalaallisut, islandermiusut tuluttullu erinarsoqattaarpai. Tusarnaartitsinermi islandermiut operamik erinarsortartuat Halldóra Ósk Helgadóttir, pattattoq pianist Hrönn Þráinsdóttir, danskit agiartartuat Peter Andreas Nielsen, minnerunngitsumillu nipilersortartuvut erinarsortartuvullu ilisimaneqarluartut Nina K. Jørgensen, Arnannguaq R. Olsen Hans Peter Bayilu erinarsuutit nuannarisatik qiiaammisaartitsillutik peqataasullu nuannisartillugit atoqattaarpaat.

NAPA-mit, Tips aamma Lottomit aningaasaliissutit, Namminersorlutik Oqartussat nunani tamalaani suliniutinut tapiissutit, Nunat Avannarliit Illuat, Kalaallit Nunaata Sinniisoqarfia aammalu Niuertarfiit Kamik tuttunik pujuukkanik, umimmammik savamillu pølselianik, Royal Greenland raajanik aammalu Godthåb Bryghus immiaaqqanik sassaallernerisigut aaqqissuussaq piviusunngorsinnaasimavoq.

Assit isiginnaakkit

Annertunerusumik paasisaqarusukkussi sinniisoqarfiup pisortaanut Jacob Isbosethsenimut +3546655610 jsis@nanoq.gl attaveqarlusi paasiniaasinnaavusi.