IGASA – meeqqat aasami atuanngiffeqarneranni igatikkit

Qanittukkut aasami atuanngiffeqarneq aallartippat Nuummi Tasiilamilu meeqqat ulluni sisamani nerisassiorneq, igaffimmi nuannisarneq peqqinnerlu qilanaarutigisinnaassavaat. Sapaatip-akunnerani 27-mi aamma 29-mi aatsaavissuaq meeqqanut qulit aqqaneq-marlullu akornanni ukiulinnut ullut nerisassiorfiit IGASA ingerlanneqassapput.

IGASA-mi meeqqat qajuutaq tigoriarlugu ullakkorsiutinik, ulloqeqqasiutinik tamulugassanillu peqqinnartunik nammineq piareersaanissamut periarfissaqassapput. Tamatuma saniatigut pinnguartoqassallunilu timimik aalatitsisoqassaaq kiisalu nerisaqarnermut innersuussutit qulit pillugit akuutitsisumik ilinniartitsisoqassalluni. Sapaatip-akunnerata naalernerani ilaqutariinnut sammisassaqartitsisoqassaaq, tassani meeqqat angajoqqaatik ooqattagassanik mamarunartunik sassaallerfigissavaat.

IGASA-mi meeqqat naqqaniit mamartunik peqqinnartunillu nerisassioqataasalernissamut piumassuseqalersinneqassapput. Peqqinnartumik inooriaaseqarneq peqqinnartunillu nerisaqartarneq meeraanermi tunngavilerneqartarput. Meeqqat nerisassioqataanermi nerisassat pillugit pingaarutilinnik ilisimasaqalertarput ilinniartarlugulu qanoq peqqinnartunik mamartunillu nerisassiortoqartartoq.

IGASA suliniutaavoq nutaaq PAARISA-mit ineriartortinneqartoq Kommuneqarfik Sermersuumillu ingerlanneqartoq. Ukioq manna Nuummi Tasiilamilu meeqqanut qulit aqqaneq-marlullu akornanni ukiulinnut ingerlanneqassaaq. IGASA aalajangersimasumik nunatsinni kommunini tamani ingerlanneqartalissasoq anguniagaavoq.

IGASA-mi peqataaneq akeqanngilaq nalunaartoqarsinnaavorlu Kommuneqarfik Sermersuup nittartagaatigut.

IGASA Pisiffimmit aamma KNI/Pilersuisumit taperserneqarpoq.

Paasisaqarnerujumallutit attavigiuk immikkoortortaqarfimmi pisortaq Ditte Sølbeck e-mailikkut: ditt@nanoq.gl imaluunniit oqarasuaatikkut +299 346037