Naalakkersuisup filmiliaq pissanganartoq tapiiffigigaa

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Baggerip eqqumiitsuliortoq inuusuttoq, pissanganartumut filmiliornissaanut, tapiiffigaa.

Marc Fussing Rosbach, ilaatigut filmiliaa siulleq “Akornatsinniittut - Tarratta Nunaanni” tunngavingalugu 2018-imi Naalakkersuisut kajumissaatitut nersornaasiuttagaannik tunisinnikoq, 300.000 kr.-nik tapiiffigitippoq filmiliarisimasami malitsissaanut “Akornatsinniittut – Kiinnappalik”-mut.

”Oqaluttuatoqaatigut nunani tamalaani filmilitut saqqummiutissallugit piukkunnartuupput nunallu inoqqaavinut tunngasut filmit soqutigineqarlutik. Ilisimariikkatsituut Marc eqqumiitsuliornikkut kulturikkullu tunngasunik suliaqartarnermigut piginnaasaqarluarpoq taamatullu filmiliornikkut. Filmiliaani siullermi takuarput pissanganartumik, kulturitta oqaluttuassartaanik isumassarsiaasumik immikkuullarissunillu sunniiniutinik atorluni oqaluttualiillaqqissuusoq. Siunissami suliaata takunissai qilanaaraakka.” Taama oqarpoq Naalakkersuisoq Ane Lone Bagger.

Marc manuskriptiliornissaminut aamma immikkut kulturimik sulialinnut aningaasaliissutinik Naalakkersuisunit taperneqarnikuuvoq. Taassuma saniatigut ukioq manna eqqumiitsuliornikkut suliat 30-t aningaasaliiffigineqarput ukiorlu manna suli marloria agguaassisoqaqqissalluni. Qinnuteqarfissap tullia septemberip aallaqqaataani 2019-imi killeqarpoq. Kalaallit Nunaanni Namminersorlutik Oqartussanit kulturimut aningaasaliissutigineqartartut pillugit www.sullissivik.gl –mut atuarneqarsinnaapput.

Sukumiinerusumik paasisaqarusuttut uunga attaveqarsinnaapput

Naalakkersuisup allattaa Rosa Thorsen, +299553303, rosath@nanoq.gl