Kommune peqqinnissaqarfillu qanimut suleqatigiinniartut

Paamiuni suleqatigiinnissamik isumaqatigiissut nutaaq illoqarfimmi utoqqaanerusunut assut nuannaarutaavoq, avatangiisit pitsaanerit aammali atukkat pitsaanerulluinnartut

Paamiut pillugu isumaqatigiissut ualimut Borgmester Asii Chemnitz Narup-imit aamma Peqqissutsimut, Isumaginninnermut Inatsiseqartitsinermullu Naalakkersuisup, Martha Abelsenip  atsiorpaat.

Paamiuni innuttaasunut ulloq assut nuannersuuvoq minnerunngitsumik illoqarfimmi utoqqaanerusunut", Borgmester Asii Chemnitz Narup oqarpoq nangillunilu:

Utoqqaat illuat nutaaq peqqinnissaqarfillu uiguleriipput taamaalilluta utoqqaanerusunut toqqissisimaneq isumassuineq peqqissaanerlu neqeroorutigisinnaanngorparput. Angerlarsimaffik nutaarluinnaq atorlugu Paamiuni utoqqaanerusut nutaamik avatangiiseqalerput, taanna illoqarfiup qeqqani inissisimavoq tassanilu utoqqaanerusut illoqarfiup qeqqani inuuneq malinnaaffigisinnaalerpaat.  Ulloq tamatsinnut nuannersorsuuvoq.  Isumaqatigiissutip nutaap qulakkeerpaa utoqqaanerusut pitsaanermik inuunermi atugassaqalernerannik.  Paamiormiut tamassi pilluangaaritsi" Asii Chemnitz Narup oqarpoq.

Paamiut pillugu isumaqatigiissut Peqqinnissaqarfiup Kommuneqarfik Sermersuullu akunnerminnik isumaqatigiissutikkut qulakkeerneqarpoq, Paamiuni sulisut aqutsisullu qanimut suleqatigiinnissaat imminnullu isumasioqatigiinnissamik periarfissinneqarnissaat. Isumaqatigiissutip periarfississavaa, suleqatigiit annertuumik ingerlatsinermi iluaqutissatigut  periarfissinneqarnissaq, soorlu ilaatigut angallannermut tunngasut aamma nerisassiornermut tunngasut. 

Naalakkersuisoq Martha Abelsen oqarpoq: ”Nuannaarutigeqaara peqqissutsikkut isumaqatigiissutip siornatigut atsioqatigiiffiusimasoq Paamiut pillugu isumaqatigiissummik malitseqartinneqarmat. Isumaqatigiissut akimut annertunerusumik suleqatigiissinnaanermik assersuutaalluarpoq naatsorsuuteqarfigilluarparalu. Kommune Paamiunilu utoqqaat illutaarnerminni suleqatigiinnissamullu pilluaqquakka.”

Paasissutissanik sukumiinerusunik piniaruit inussiarnersumik qinnuigissavatsigit uunga saaffiginneqqullutit, naalakkersuisup allattaa Inger Heilmann Larsen, tlf. 554160 imaluunniit Kommuneqarfik Sermersuumi attaveqaqatigiinnermi sulisoq Irene Jeppson, tlf. 531415