Kalaallit Nunaat USA-lu teknikkikkut suleqatigiilersut

Aatsitassanik aqutsineq suleqatigiinnerlu pillugit paaseqatigiinnissamik isumaqatigiissusiornikkut (MOU) Aatsitassanut Suliffeqarnermullu Naalakkersuisoqarfik kiisalu USA-p Nunanut Allanut Ministeriaqarfia suleqatigiillutik Kujataani silaannarmiit aatsitassanut aningaasaliiffiusinnaasunik misissuilerput.

Aatsitassanut Suliffeqarnermullu Naalakkersuisoqarfik kiisalu USA-p Nunanut Allanut Ministeriaqarfia Kalaallit Nunaanni teknikkikkut suleqatigiinnerit ingerlareersut pilersaarutigineqartullu timitalerlugit Juni 2019-imeersumik paaseqatigiinnissamik isumaqatigiissusiorput Aatsitassanut Suliffeqarnermullu Naalakkersuisumit Erik Jensenimit aammalu USA-mi Nukissiutit pillugit Pisortap tullianit Francis R. Fannonimit atsiorneqartumik. Paaseqatigiinnissamik isumaqatigiissut aatsitassanik aqutsinermi Kalaallit Nunaata USA-llu suleqatigiinnerannik toqqammaviliisuuvoq. Toqqammaviit taakku aallaavigalugit Kalaallit Nunaanni Aatsitassanut Suliffeqarnermullu Naalakkersuisoqarfik kiisalu USA-p Nunanut Allanut Ministeriaqarfia peqatigiillutik aasaq manna Kujataata ilaata sananeqaataa Gardar Provincemik taasaq 3.000 kvadratkilometerinik annertutigisoq silaannarmiit misissuiffigissavaat. Timmisartut atorlugit misissuineq Narsarsuarmit aallaaveqarluni Juulimi Aggustimilu ingerlanneqassaaq.

Nukissiutit pillugit Pisortap tullia Francis R. Fannon oqarpoq “Kalaallit Nunaat pisuussuteqaqaaq isumaqatigiissutikkullu tassuuna nukissiornikkut aatsitassarsiornikkullu periarfissat pitsaanerpaanngortinniarneqarput. Nunarsuarmi politikkikkut suleqatitut pingaarutilittut qularnaarusupparput Kalaallit Nunaata nammineq nukissiornikkut aatsitassarsiornikkullu isumannaatsumik ingerlanissaminik anguniagaqarnermini aningaasaliisut assigiinngitsut namminersortullu qarmarsinnaanngussagai.”

Gardar Province aatsitassanik nioqqutigineqarsinnaasunik assigiinngitsunik nutaanik nassaarfigissallugu ilisimanaateqaqaaq, soorlu aatsitassanik qaqutigoortunik, aammalu Greenland Minerals Ltd kiisalu Tanbreez Ltd qaffakarfimmi Ilimmaasami aatsitassaqarneranik misissuinissamut akuersissuteqarput, tamannalu Gardar Provincep ilagisaa aatsitassat qaqutigoortut pinngorarfigisimavaat.

Aatsitassanut Suliffeqarnermullu Naalakkersuisoq Erik Jensen oqarpoq “Aatsitassanut Suliffeqarnermullu Naalakkersuisoqarfik aatsitassarsiornikkut ineriartortitsinissaq eqqarsaatigalugu ilisimatuussutsikkut teknikkikkullu ilisimasanik paarlaasseqatigiittarnissaq pillugu USA-mut qangali suleqateqarpugut. Paaseqatigiinnissamik isumaqatigiissut manna suleqatigiinnermi immikkoortuuvoq aatsitassarsiornerullu ineriartortinneqarnerani suleqatigiinnissamut pisussaaffileqatigiiffiulluni. Isumaqatigiissutikkut tassuuna paasissutissanik katersineq qitiutipparput siunissami aatsitassarsiornermi toqqammaviusussaammat. Paasissutissat amerliartortillugit suut sukumiinerusumik misissuiffigineqarnissaannik naliliineq ajornannginnerujartussaaq. Misissuinermi matumani paasisat siunissami suliffeqarfinnut misissuiniartunut akeqanngitsumik atugassanngortissinnaanngussavavut, misissuinerlu tamaani misissuinernut allanut pingaaruteqartumik tapertaassaaq.”

Seqerngup qinnguaasa nunap qaaniit utersaarneri uuttortarlugit, silaannarmit misissukkat katersorneqartarput. Qaamanerit tassaapput isaannarmik takuneqarsinnaasut, aammali qaammanerit maligaasakitsuaqqat isaannarmik takuneqarsinnaanngitsut atorneqassapput. Qaamaneq tamanna ujaqqat aatsitassanik sunik imaqarnerannik paasisaqarfiusarpoq, aatsitassaqarfinnillu paasisimaneqanngikkaluartunik ujarassiuunut takutitsisinnaalluni taavalu nunap sananeqaataanik assiliukkanut pitsanngorsaatitut atorsinnaalluni, taamaalillutillu aatsitassanik ujaasisartut misissuiffissaminnik sukumiinerusumik toqqaasinnaanngussallutik.

Paasissutissat suliareqqinnagit kiisalu qaarsut aatsitassallu sumiissusiinut nalunaarsuganngorlugit tunniunneqassapput. Paasissutissat taama ittut aatsitassarsiortartunut atugassanngortinnerisigut nunani allanit aningaasaliisarneq najukkamilu suliffissaqartitsineq siuarsarneqassapput. Suliniut taanna Aatsitassanut Suliffeqarnermullu Naalakkersuisoqarfiup ujarassiornermut immikkoortortaanit aammalu USA-p Nunanut Allanut Ministeriaqarfiata nukissiutinut immikkoortortaata aningaasaleeqatigiinnerisigut nunap sananeqaataanik ilisimatusarnermut ilaavoq, Kalaallit Nunaannullu aningaasaliiumasut amerlinissaannik siunertaqarfiulluni.

Paasissutissanik sukumiinerusunik pissarsiniaraanni attavissat:
Thora M. Hansen, allatsi, Aatsitassanut Suliffeqarnermullu Naalakkersumut. Mail: thora@nanoq.gl toqq.: +299 346839
Jørgen T. Hammeken-Holm, Naalakkersuisoqarfimmi Pisortaaneq. Mail: joeh@nanoq.gl toqq.: +299 346846





Atsioqatigiittut:

Paul Hueper, Director, Office of Energy Programs, Bureau of Energy Resources, U.S. Department of State, sinnerlugu U.S. Assistant Secretary of State for Energy Resources Francis R. Fannon

Erik Jensen, Naalakkersuisoq Aatsitassanut Suliffeqarnermullu