Tasiilamut ikiuinerit ataqatigiissaartariaqarput




Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen Tasiilami Alivarpimmi sisamanngorneq 30. maj 2019 workshoppertitsinertalimmik innuttaasunik ataatsimiisitsivoq.

“Tasiilami periarfissat pillugit pingaarnertullu DR-ip piviusulikkersaarusiaata ”Byen, hvor børnene forsvinder”-p aallakaatinneqarnerata kingorna pissutsit pillugit isumaat tusarniarlugit aggeratta innuttaasut nuannaarutigaat. Qanoq ililluta, innuttaasut oqartussaasullu, ataatsimoorluta kivitsisinnaanerluta pingaarnertullu isumaginninnermi unammilligassat aaqqinneqarnissaat pillugit oqalliseqataanertik nuannaarutigaattaaq”, Naalakkersuisoq Martha Abelsen oqarpoq.

Tasiilami Alivarpimmi atuartut annerit aaqqissuussap aallartinnginnerani siunissaminnik takorluuinertik pillugu allaaserinnissimapput assilialiorlutillu. Innuttaasunut ataatsimiititsinermi inuusuttut suliaat aallaavittut atorneqarput. Atuartut annerit sammisat sisamat innuttaasunut ataatsimiisitsinermut nassarpaat: Ilinniarnissamut periarfissat, attaveqaqatigiinneq, sunngiffimmi periarfissat ataatsimoorussamillu ilaqutariinnut suliniuteqarneq. Tasiilami atuartut annerit illoqarfimmi ilinniarnissamut periarfissanik amerlanerusunik perusupput, pitsaanerusumik internetteqalernissartik mittarfeqarnissartillu kiisalu sunngiffimmi suliassanik timersornermilu sammisassanik amerlanerusunik neqeroorutinik periarfissiisoqassasoq kissaatigaat, aamma ilaqutariinnut inooqatigiinni unammilligassalinnut ataqatigiissaagaanerusumik suliniuteqartoqarnissaa pingaarnertullu Tasiilami ilinniarnissamut suliffeqarnissamullu periarfissat pitsaanerusut kissaatigalugit.

“Avataanit isummatsinnik oqariartuuteqarfiginagit, innuttaasut imminnut meeqqaminnillu aallaaveqarnissaat taamaalilluta periarfissipparput,
Martha Abelsen itisiliivoq.

Tasiilami Kalaallit Nunaatalu sineriaani meeqqat ikiorneqarnissaat tunngavigalugu Naalakkersuisut Danskit Naalagaaffiannut ikioqqullutik saaffiginnissuteqassasut Inatsisartut isumaqatigiissut qanittukkut aalajangerpaat. Tasiilami innuttaasunik ataatsimiisitsinermit oqariartuutigineqartoq tassaavoq, Danmarkimut saaffiginnittoqartinnagu ikiorsiineq peqqissaartumik ataqatigiissaarneqartariaqartoq.

“Assersuutigalugu qallunaap psykologip inuutaasullu kalaaliusup akornanni oqaatsitigut unammilligassat innuttaasut soqutigisaraat. Naak nutserisumik ikiorneqaraluarlutik, oqaloqatigiinneq kulturit oqaatsillu assigiinngitsut atorlugit ingerlanneqaraangat, taava 100%-imik oqaatigerusutatik oqaatigisinnaaneq ajorlugit misigisimasarsimallutik siusinnerusumimmi misilittagaasa takutippaat. Taamaattumik avataaniit ikiuisussamik aallertinnata ataatsimoorussatsinnik aaqqiissutissamik nassaartariaqarpugut” Martha Abelsen oqarpoq.

Innuttaasunik ataatsimiisitsineq pisinnagu, Tasiilami unammilligassat Inatsisartullu Danmarkimit ikiuisunik aallertoqarnissaanik aalajangiinerat pillugit isumaat tusaarusullugit Najukkami ataatsimiititaliaq kiisalu Kommuneqarfik Sermersuumi kommunalbestyrelsimut ilaasortat Naalakkersuisup ataatsimeeqatigai. Periarfissarlu atorlugu Prinsesse Margrethep meeqqanut angerlarsimaffia, Politeeqarfik aamma Peqqinnissaqarfik naalakkersuisup pulaarpai kiisalu 1. juni 2019 Meeqqat Ulluat peqataaffigalugu.

Innuttaasunik ataatsimiisitsinermit inerniliussat Naalakkersuisunut kiisalu Kommuneqarfik Sermersuumi borgmesterimut saqqummiunneqarumaarput.

Attavissaq
Paasisaqarnerorusukkuit naalakkersuisup allattaa Inger Heilmann Larsen på e-mailikkut: ihla@nanoq.gl-ikkut imaluunniit oqarasuaatikkut +299 554160-ikkut attavigiuk.