Meeqqat tamaasa ukkatarissavagut!

Peqqissutsinut, Isumaginninnermut Inatsisinillu Atuutsitsinermut Naalakkersuisoq Martha Abelsenimit

Kalaallit Nunaanni Meeqqat Ulluat ullumikkut 1. Juni nalliuttorsiutigivarput.

 

Ileqquulersimasutut meeqqat tamaasaa – mikisuuppata angisuuppatalu – nunaqarfimmi illoqarfimmilu – nalliuttorsiutigisaratsigit pitsaasuuvoq pingaaruteqarlunilu.

 

Ukioq manna Tasiilami meeqqat peqatigalugit ulloq nalliuttorsiutigisinnaagakku nuannaarutigaara.

 

Kalalaallit Nunaanni meeqqat amerlasuut iluarusullutik pitsaasumillu inuuneqarput.  Taamaattoq toqqissisimasumik iluarusullutik inuunissamut pitsaasumillu ineriartornissamut unammilligassarpassuaqartunik meeraqarpoq.  Taamaammat inersimasut oqartussaasullu, peqatigiiffiit kattuffiit il.il. meeqqat tamarmik toqqissisimasumik pitsaasumillu inuuneqarnissaat pillugu qulakkeerinninnissaq eqeersimaffigissagaat pingaaruteqarpoq.

 

Meeqqat iluarusunnissaat meeqqallu tamarmik toqqissisimasumik avatangiiseqarnissaat pillugu ullut tamaasa qitiusumi piffinnilu ataasiakkaani nukippassuit suliaqarmata qujanaqaaq.  Nunatsinni maani qularutissaanngilluinnarpoq politikerit tamarluinnarmik – nunamut tamarmut politikerit kommuninilumi aamma – nunatsinni meeqqat tamarmik toqqissisimallutik pitsaasunillu avatangiiseqarlutik peroriartornissaat kissaatigaat.  Nunami tamarmi sulianik sullissisartoqarpoq, taakkulu ullullu tamaasa meeqqatsinnik naapitsisarput qanoq iliorsinnaanertillu malillugu toqqissisimanartumik pitsaasumillu ulluinnaqarnissaat sulissutigaat.  Taamatuttaaq ngo´t kattuffiillu assigiinngitsut, assersuutigalugu MIO, Nakuusa aamma Foreningen Grønlandske Børn, meeqqat pitsaanerusunik atugassaqarnissaannik pisinnaatitaaffeqarnissaannillu qulakkeerinninnissamik sulissuteqartuupput.

 

Meerartatta pitsaanerusumik atugaqalernissaat anguniarlugu suliniutit aallartinneqareersut akornanni ilaatigut Nakuusap meeqqanut isumalioqatigiissitaa taaneqarsinnaavoq.  Nuannaarutigilluinnarpara kommunini tamani Nakuusa meeqqanut isumalioqatigiissitanik pilersitsisimammat.  Taamaaliorneq meeqqat nipaasa tusaaneqarnissaannik qulakkeerinneqataavoq. 

 

 

Politikerinut, sulianik sullissisartunut kattuffinnullu oqarusuppunga:  Meeraq sumiginnagaasimatillugu tamattaalluta tapersersuinissarput ikiuunnissarpullu pingaaruteqarluinnarpoq.  Taamatuttaaq meeqqat tamarmik pitsaasumik toqqissisimanartumillu inuuneqarnissaat qanoq ilillugu qulakkeerneqarnissaata ukkatariuarneqarnissaa pingaaruteqartorujussuuvoq. Meeqqat tamarmik – angisuut mikisullu – illoqarfinni nunaqarfinnilu – ilinniarneq pinnguarnerlu, timersorneq, nipilersorneq pinngortitarlu aqqutigalugit ineriartornissaat tamattaalluta qulakkiissavarput.  Meerartagut imminnut upperalutik inuussapput, nuannartuullutik sinnattuaqisinnaallutillu.  Meeqqat tamarmik tamanna pisariaqartippaat.

 

 

Attavissaq

Paasisaqarnerorusukkuit naalakkersuisup allattaa Inger Heilmann Larsen e-mail: ihla@nanoq.gl aqqutigalugu imaluunniit tlf. + 299 554160 atorlugu attavigiuk