Naalakkersuisup Ane Lone Baggerip Avalak oqaloqateqatigaa

Qaammatit kingulliit ingerlanerini aningaasanut inatsimmi Avalammut aningaasaliissutit tusagassiorfinni oqallisigineqarsimapput. Tamanna tunuliaqutaralugu Ilinniartitaanermut, Kultureqarnermut Ilageeqarnermullu Naalakkersuisoq aammalu Avalammi siulersuisuunerit 5. maj 2019-imi Kalaallit Nunaata Københavnimi Sinniisoqarfiani oqaloqatigiillutik ataatsimiipput.

Tusagassiorfinni oqallinnerit ingerlasut illuatungeriinnut tunngasut tamarmik mumisinneqarput. Peqatigiiffinnut aningaasanut inatsimmit aningaasaliiffigineqartunut naatsorsuutinut piumasaqaatit inatsisitigut pisussaaffigisat pillugit kiisalu tipsernermit lottornermillu aningaasaliissutinik qinnuteqarnissamut periarfissat pillugit Ane Lone Bagger nassuiaavoq. Avalammut aningaasaliissutit piffissap sivikitsup iluani allanngortinneqartarnerisa kingunerisaannik unammilligassat kiisalu naatsorsuusiortarnermut kukkunersiuisarnermullu sulianik unammilligassat Avalammit erseqqissarneqarput.

Tamatuma saniatigut Danmarkimi ilinniartuunermi maannakkut ajornartorsiutaasut Avalammit oqaatigineqarput. Peqatigiiffiup Danmarkimi ilinniartunut sammitittagai, ataqatigiinnissaq pillugu iliuuserisartagai kiisalu ilinniarnerup naammassinerani nunatsinni periarfissat soqutiginarsarnissaannut iliuuserisartagai Avalammit oqaatigineqarput.

”Innuttaasut toqqaannartumik oqaloqatigisarneri uannut pingaarnerpaat ilagaat aamma Avalak pitsaasumik suleqatiginissaa kissaatigaara. Avalaap sammitittagai peqatigiiffiullu unammilligassat nalaattagai Danmarkimilu ilinniartut misigisartagaat tusarlugit soqutiginarsimavoq. Avalammit paasissutissiissutigineqartunit pissarsiaqangaatsiarpunga tamakkualu siunissami suleqatigiinnitsinnut pingaaruteqarput", Naalakkersuisoq Ane Lone Bagger oqarpoq.

Siunissaq eqqarsaatigalugu peqatigiiffiup suliai pitsanngorsarniarlugit Naalakkersuisup Ane Lone Baggerip Avalaallu oqaloqatigiilluartarnissaat pingaartinneqassaaq.