Tasiilaq pillugu oqartussaasut suleqatigiipput

Meeqqanut inuusuttunullu kinguaassiuutitigut atornerluisoqarsimaneranik pasitsaassaqarnermi ilisimasaqarnermiluunniit upalungaarsimanissaq aamma iliuusissanut ilitsersuut pillugit Kommuneqarfik Sermersooq, Kalaallit Nunaanni Politiit aamma Namminersorlutik Oqartussat suleqatigiinnissamik isumaqatigiissuteqarput.

 

Kommuneqarfik Sermersooq, Kalaallit Nunaanni Politiit aamma Namminersorlutik Oqartussat oqartussaasoqarfiit assigiinngitsunik suliallit akornanni suleqatigiinnissamik isumaqatigiissuteqarput, tassani Tasiilami meeqqanik atornerluisarnerit qanoq pitsaaliorneqarnissaat, ikilisinneqarnissaat katsorsaasarnerillu ataatsimoorussamik ataqatigiissaagaasumillu aallartinneqarnissaat siunertarineqarpoq.  2018-imili aallartinneqartumik qanimut suleqatigiittoqareersorlu isumaqatigiissut isumaqatigiissutigineqarpoq.

 

“Tasiilami meeqqanut inuusuttunullu atugassarititaasut pitsanngortinneqarnissaannut suleqatigiinneq alloriarneruvoq.  Upalungaarsimanissaq pillugu suleqatigiinnerup assigisaanik Kalaallit Nunaata sinnerani pilersitsisoqarumaartoq neriuppunga” Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq.

 

Kommuneqarfik Sermersuumi borgmesteri Asii Chemnitz Narup taamatuttaaq isumaqatigiissummik iluarinnippoq oqarlunilu:  “Suliassaqarfik ukkatariuassavarput ataatsimoorussamillu patajaallisakkamik suleqatigiinnitsigut eqqortumik sammiveqarluta ingerlalerpugut.  Meeqqanut inuusuttunullu navianartumiittunut pitsaaqutaasumik ataatsimoorluta sullissinerulissaagut.  Siunissami suleqatigiinnissarput qilanaaraara.”

 

Kalaallit Nunaanni Politiini politimesteri Bjørn Tegner Bay aammattaaq isumaqatigiissummik iluarinnittorujussuuvoq:  “Ataatsimoorluta suut tamaasa atorlugit ikiorniaratsigit, meeqqat oqartussaasunik arlalinnik naapitsinerminni malugissagaat neriuutigaara. Isumaqatigiissutip massuma taamaattoqarnissaa qulakkeerinneqataaffigissavaa.”

 

Tasiilami meeqqanik atornerluisoqartarneq pillugu oqartussaasut ataatsimoorlutik pitsaaliuinermi, ikilisitsiniarnermi katsorsaanermilu imminut pituttuiffiusumik, piffissaq eqqorlugu, oqartussaasoqarfiit assigiinngitsunik suliallit akornanni suleqatigiinnissaat isumaqatigiissutip kinguneraa.

 

Attaveqarfissaq

Annertunerusumik paasisaqarusukkuit naalakkersuisup allattaa Inger Heilmann Larsen

e-mailikkut: ihla@nanoq.gl-ikkut imaluunniit oqarasuaat + 299 554160 atorlugu attavigiuk imaluunniit Kommuneqarfik Sermersuumi Irene Jepsson +299 367020 imaluunniit +299 531415