Piffissamik neqeroortitsiviusumik sivitsuineq

Sisorartunik takornariartitsisarnermik neqerooruteqartarnermik kisermaassilluni ingerlatsisinnaanermut akuersissuteqartoqarnissaanut suliariumannittussarsiuussinermi Sisimiut avannaanni Aqqutsikitsumi aamma Ungalliup Qaqqaani akuersissuteqarfiusussamut piffissaq neqeroortitsiviusoq Inuussutissarsiornermut, Nukissiuuteqarnermut Ilisimatusarnermullu Naalakkersuisoqarfimmit sivitsorneqarpoq.

Naalakkersuisoqarfik saaffiginnissummik tigusaqarsimavoq qinnuteqarnissamut piffissaliussaq pillugu. Akuersissuteqarnissamut qinnuteqaatip annertussusaa pisariussusaalu eqqarsaatigalugit qinnuteqarnissap sivikippallaarnera erseqqissaatigineqarpoq. Taamaattumik piffissap qinnuteqarfissap sivisussusaata tallineqarnissaa Naalakkersuisoqarfimmiit aalajangiunneqarpoq.  

Kisermaassinertalimmik sisorartunik takornariartitsisarnermut akuersissuteqarfigineqarnissamut qinnuteqaatit Aqqutsikitsumut aamma Ungalliup Qaqqaanut tunngasut Inuussutissarsiornermut, Nukissiuuteqarnermut Ilisimatusarnermullu Naalakkersuisoqarfimmi tiguneqareersimassapput kingusinnerpaamik tallimanngorneq 12. juli 2019, nalunaaqutaq 23.59 Nuummi, Kalaallit Nunaanni nalunaaqutaq naapertorlugu.

Apeqquteqaatinik nassiussisinnaanermut piffissaliussaq aamma sivitsorneqarpoq. 30. juni 2019 tikitsinnagu qinnuteqaqqusissummut ilanngussassanullu tunngatillugu apeqqutit  Inuussutissarsiornermut, Nukissiuuteqarnermut Ilisimatusarnermullu Naalakkersuisoqarfimmut uunga e-mailimut: isiin@nanoq.gl nassiunneqareersimassapput. 

Qaaqqusissutitut allakkiaq aamma allat akuersissuteqarnissamut atortussat piumasaqaataasunik tamanik imallit, malittarisassat, qinnuteqarnermi immersugassaq skema ilanngullugu, aamma qinnuteqarnermut ilitsersuut tigoriaannaapput, nassaassaallutillu uani:

https://www.businessingreenland.gl/kl-GL/Udbud/Aktuelle-udbud/Skiturisme-ved-Aqqutikitsoq-og-Ungalliup-Qaqqai

Apeqqutit akissutillu tamarmik kinaassutsimik ersersitsinertaqanngitsumik Naalakkersuisut nittartagaani saqqummiunneqarumaarput.