Amerikamiut sakkutooqarfigisimasaannik saliineq aallartippoq

Maanna Amerikarmiut qimaannangaannik saliineq aallartippoq, Tasiilap eqqaani Ikkattimi aamma Nuup kujataani Marrarmi. Uulianut nappartakorsuit manngertornernikut, kemikaliat allatigullu mingutsitsinerit piiarneqassapput

Kommuneqarfik Sermersooq saliinissani siullerni marluusuni tamanut suliariumannittussarsioqqammerpoq. Aallaqqaammut sapaatit akunnerini pingasuni sumiiffinni taakkunani saliisoqassaaq. Taamatut saliinerup siunertaraa eqqakkanik saliinissaq iluatsillugulu qanoq mingutsitsisoqartigisimanersoq misissussallugu, mittarfeqarsiusimasut salillugit aallartivinneqannginnerini.

 

Januarimi 2018-imi Naalakkersuisut Siulittaasuat Kim Kielsen aamma Danmarkimi Avatangiisinut Inuussutissanullu Ministeriusimasoq Esben Lunde Larsen politikkikkut isumaqatigiissuteqarput Kalaallit Nunaanni Amerikarmiut qimaannagaannik saliinissamut tunngasumik. Isumaqatigiissummut atatillugu Danmarkip 180 millioner koruunit immikkoortippai ukiut arfinillit ingerlaneranni amerikamiut sakkutooqarfikuinik salinneqarnissaannut atugassanik.

 

Saliinissaq aallartinneqalermat nuannaarpunga. Nunatsinni Amerikarmiut sakkutooqarfikuini saliisoqarnissaa Kalaallit Nunaannit ukiorpassuarni kissaatigineqarsimavoq. Danskit naalakkersuisuisa aamma Naalakkersuisut akornanni isumaqatigiissuteqartoqarneratigut saliinissaq, aamma amerikamiut qimataannik saliinermut inuiaat kalaallit akiliinnginnissaat qulakkeerneqarpoq, taama oqarpoq Naalakkersuisut Siulittaasuat Kim Kielsen.

 

Kalaallit Nunaata Danmarkillu ilaasortaaffigisaannik aqutsisoqatigiinnik pilersitsisoqarpoq, aqutsisoqatigiillu politikkikkut isumaqatigiissutip piviusunngortinneqarnissaa akisussaaffigaat. Aqutsisoqatigiit ataatsimoorlutik aalajangertarpaat sumi qaqugulu saliisoqassanersoq. Aqutsisoqatigiit aamma isummerfigissavaat sumiiffinni taakkunani mingutsitsisoqarsimanissaanik naliliinissamut pisariaqartitsisoqarnersoq. 

 

Sumiiffinni marlunni suliaqartoqarnerani aamma avatangiisinik misissuisoqassaaq, sumi sukumiisumik avatangiisinik misissuisoqassanersoq aqutsisoqatigiit isummerfiginiassammassuk. Sakkutooqarfikuni qanoq mingutsitsisoqarsimatiginersoq paasisariaqarparput. Paasissutissat taakku pingaaruteqarput, saliilluartoqarnissaa anguniarlugu, Naalakkersuisut Siulittaasuat oqarpoq.

 

Suli iluamik aalajangiunneqanngilaq Ikkattip ilaa kulturikkut oqaluttuarisaanermut pingaaruteqarnera pissutigalugu allanngutsaaliorneqassanersoq.

 

Saliinissap piviusunngornissaanut danskit aamma kalaallit oqartussaasuisa akornanni pitsaasumik siunnerfeqartumillu suleqatigiittoqanera nuannaarutigaara. Kommuneqarfik Sermersooq suliassanut toqqaannartorujussuarmik tunniusimallunilu akuunera suliamut annertuumik nukittorsaataavoq, Naalakkersuisut Siulittaasuat Kim Kielsen oqarpoq.

 

Amerikamiut Kalaallit Nunaanni sakkutooqarfigisimasaminniinnerisa kingorna saliinissamut isumaqatigiissut uani atuarneqarsinnaavoq.

 

Annertunerusumik paasisaqarusunnermi: Naalakkersuisoqarfimmi Pisortaaneq Mette Skarregaard Pedersen, Pinngortitamut Avatangiisinullu Naalakkersuisoqarfik, Tlf. 346476, E-mail: pan@nanoq.gl.