Avitseqatigiinnerit oqallinnerillu apeqqutinik, akissutinik peqataatitsinermillu ammaassipput

Aatsitassanik Suliaqarfinnut Avatangiisinut Aqutsisoqarfik 13. - 20. februar 2019-imi Kalaallit Nunaata kujataani avitseqatigiinnerit oqallinnerillu pillugit nalunaarusiorpoq. Avitseqatigiinnerit oqallinnerillu aatsitassanut suliniutinut pillugit oqartussaasutut suliaqarnermut ilisimatuullu naliliinerinut tunngasuupput

Avitseqatigiinnerit oqallinnerillu 11-t, katillugit 250-it missaanni orniguttullit ingerlanneqarput. Najukkani inuiaqatigiit siammasissumik sinniisoqarput, tassami najukkani politikerit, soqutigisaqaqatigiiffinnit sinniisut, inuusuttut utoqqaallu, angutit, arnat, sulisartut, ilinniarsimanngitsut, nunap immikkoortuani aatsitassarsiornerup ineriartortinneqarneranut akerliusut tapersersuisullu peqataagamik.

 

Avitseqatigiinnerni oqallinnernilu tamani naapeqatigiinneq pillugu naliliiffissatut immersugassanik agguaasoqartarpoq immersukkallu 175-it immersorneqarsimallutik.

Naliliinermik immersukkat takutippaat peqataasut amerlanersaasa pitsaasumik naliliiffissaq x-ilersimagaat.

 

Naliliinermi apeqqutinut oqaaseqaatit assigiinngitsorpassuupput. Peqataasut amerlanersaasa naapeqatigeeriaaseq peqataatitsinerusutut misigaat, ataasiakkaat filmit paasissutissiisut atorlugit inuiaqatigiit paasissutissinneqarnissaat orniginerugaat. Paasissutissiinerup imarisai sammisat oqallisigineqartut pillugit peqataasut paasisaqarnerunerannik kinguneqarput, ilaalli paasissutissinneqarnissamik pisariaqartitsinerat naammattumik matussuserneqarani. Peqataasut ilaasa kingunerisassanik annilaangassuteqarnertik peqqutigalugu aatsitassarsiulersinnaaneq tunuarsimaarfigalugu oqaatigaat, peqataasulli ilaasa suliffissaqalernissamik nunallu immikkoortuani siuariartoqarnissaanik neriuuteqarlutik oqarlutik.

 

Inussiarnersumik ilisimatitsissutitut oqaatigineqassaaq Kalaallit Nunaata kujataani avitseqatigiinnerit oqallinnerillu pillugit nalunaarusiat Naalakkersuisut nittartagaanniimmata uanilu atuarneqarsinnaallutik.

 

Annertunerusumik paasisaqarusuttut attaveqarsinnaapput:

Aatsitassanik Suliassaqarfinnut Avatangiisinut Aqutsisoqarfimmi immikkut siunnersorti Kristine Lynge-Pedersen, tlf.: 345138, mail: krlp@nanoq.gl

Aatsitassanik Suliassaqarfinnut Avatangiisinut Aqutsisoqarfimmi pisortaq Najaaraq Demant-Poort, tlf.: 346838, mail: nasd@nanoq.gl