Oqartussaaffinni allanngortoqarnera

Naalakkersuisut Siulittaasuat oqartussaaffinnut immikkoortortami marlunnik allanngortitsiniarluni aalajangersimavoq, tassalu Naalakkersuisunut ilaasortat akornanni oqartussaaffiit agguataarneranni.

Pinaveersaartitsinerup tungaatigut ilaqutariinnut meeqqanullu suliniutit Isumaginninnermut Aqutsisoqarfimmi katersuunneqassapput, matumanilu suliniutit sorpassuarnut tunngasut massakkut aqutsisoqarfinnut suliffeqarfinnullu agguataarneqartut ataqatigiissarnissaat pitsaanerusumillu angusaqarfiginissaat siunertarineqarpoq. Taamatut suliniuteqarneq Meeqqat Inuunerissut Naalakkersuisut ukioq manna januaarip 30-ani atulersitaat aqqutigalugu takuneqarsinnaavoq.

Pinaveersaartitsinermut suliassaqarfimmi allannguinerit akisussaaffik Peqqissutsimut, Isumaginninnermut Inatsisinillu Atuutsitsinermut Naalakkersuisup isumagisaa aqqutigalugu pissapput.

Aatsitassanut suliassaqarfimmi aatsitassanut akuersissuteqartarnermi suliassanik suliarinnittarneq Aatsitassanut Suliffeqarnermullu Naalakkersuisoqarfimmi ataatsimoortinneqalissaaq. Tamanna pissaaq aatsitassanut tunngatillugu inuiaqatigiit aningaasaqarnikkut isumannaatsumik ingerlanissaat aamma innuttaasut akulerusimanissaat pillugit suliassaqarfiit Inuussutissarsiornermut, Nukissiuuteqarnermut Ilisimatusarnermullu Naalakkersuisoqarfimmiit Aatsitassanut Suliffeqarnermullu Naalakkersuisoqarfimmut nuunnerisigut. Suliassaqarfimmut ilaatigut VSB pillugu nassuiaatinik aamma IBA pillugu isumaqatigiissutinik taaneqartartut kiisalu tamanut tusarniaanerit ilaapput.

Aatsitassanut suliassaqarfimmi allannguinerit aatsitassanut suliassaqarfimmi oqartussaanerup ilusaata tapersersuiffiginissaa pisariillisarnissaalu anguniarlugit ingerlanneqassapput. Ulluni makkunani aatsitassarsiornerni inuiaqatigiit aningaasaqarnikkut isumannaatsumik ingerlanissaat pillugit massakkut suliat pingaarnertigut oqartussaasunit naammassillugit suliarineqarsimalerput. Tamakku Naalakkersuisut nittartagaatigut immikkut ilisimatitsissutigineqarput.

Oqartussaaffiit agguarnerat massakkut atuuttoq Naalakkersuisut nittartagaanni takuneqarsinnaavoq.

Paasissutissat allat: Naalakkersuisut Siulittaasuata Naalakkersuisoqarfia. E-maili: govsec@nanoq.gl, Oqarasuaat +299 34 50 00