Isumaginninnermut suliassaqarfimmi Danmarkimit ikiorneqarnissaq pillugu KNR-ip ilanngussaanut naqqiut

DR-ip piviusulikkersaarusiaata ”Byen hvor børn forsvinder” ulloq 6. maj DR2-kkut aallakaatinneqarnerata kingorna, KNR arlaleriarluni allappoq Naalakkersuisut Danmarkimit ikiorneqarnissaq kissaatiginngikkaat, tamannali piviusumik eqqortuunngilaq.  Naalakkersuisut qallunaat oqartussaasui qanimut suleqatigaat suleqatigiinnerlu taanna ukiorpassuarni ingerlassimallugu. 

KNR-ip ilanngussaani pingasuni “Martha Abelsen Ajornartorsiutaasut qulaajarneqarluaqqaartariaqartut”, “Isumaginninermik susassaqarfik: Naalakkersuisut ikiorneqarumanngillat – dankit politikerii ikiuerusupput” aamma “Abelsen Tasiilaq pillugu Avataanit ikiorneqarnissaq pisariaqanngilaq” –ini kiisalu Sermitsiaq.AG-ip ilanngussaani “Danskinit ikiorneqarnissamut Martha Abelsen naaggaarpoq”-mi Naalakkersuisut ikiorneqarusunngitsutut imaluunniit qallunaat oqartussaasuinik suleqatiginnikkusunngitsutut saqqummiunneqarput.

Issuaanerit kukkusut eqqunngitsumillu paasissutissiinerit amerlanerusut peqqunagit, Naalakkersuisut ugguuna uppernarsarusuppaat isumaginninnermik suliassaqarfik pillugu nalinginnaasumik aamma Tasiilami suliaqarnermi,  qallunaat oqartussaasui qanittumik suleqatigineqareermata.  Kalaallit qallunaallu oqartussaasui qanittumik suleqatigiipput isumaginninnermullu suliassaqarfik pillugu ukiorpassuarni qanittumik suleqatigiissimallutik. 

Taamaalillutik issuaaneq kukkusoq siulleq 9. maj 2019-imi ilanngunneqartoq “Abelsen Tasiilaq pillugu:  Avataanit ikiorneqarnissaq pisariaqanngilaq”   naqqiissuteqarfiginiarlugu ulloq 11. maj 2019 Naalakkersuisut tusagassiuutinut nalunaarut “Qallunaat oqartussaasuinik, fondinik aamma soqutigisaqaqatigiiffinnik Naalakkersuisut suleqateqarput” saqqummiussimavaat.

Pineqartumi qitiusoq erseqqissarniarlugu siunissamilu paatsuuinerit pinngitsoortinniarlugit issuaanermi “Isumaqanngilaq avataaninngaanniit tikittut, innuttaasut taamatut sullisissagunikkit,   isumaaruttarpoq, qimagunnerit tamaasa takujuaannarparput, ajornartorsiut taannaajuaannartarpoq, ilanngussami “Abelsen Tasiilaq pillugu: Avataanit ikiorneqarnissaq pisariaqanngilaq”- mi 9. maj 2019-imi saqqummiunneqartumi suna pineqarnersoq pillugu Naalakkersuisut itisileerusupput. 

Ikiorsiisoqaraangat pingaaruteqarpoq ikiorsiineq piffissami qaninnerusumi ungasinnerusumilu sunniuteqartassasoq issuaanerup erseqqissarpaa.

Danmarkimit ikiunerit pineqartartut Naalakkersuisut nuannaarutigaat, taakkumi Kalaallit Nunaanni meeqqanut- inuusuttunullu suliassaqarfimmi suliniutit patajaallisarpaat.  Suleqatigiinneq atorluarneqarsinnaaqaaq, tassami isumaginninnermi ajornartorsiutinut aaqqiissutissat Kalaallit Nunaanni nassaarineqassapput, kalaallillu kulturiat inuiaqatigiillu aallaavigisussaallugit.  Isumaginninnermi suliassaqarfiup imminut napatittup ineriartortinneqarnissaata ingerlatiinnarneqarnissaa Naalakkersuisut soqutigisaraat.  Danmarkimit ikiuutigineqartartut taamaalillutik imminut ikiornissamut ikiuutitut isikkoqarput.  Qallunaat oqartussaasuisa tamannarpiaq paasilluarpaat, tamannalu suleqatigiilluarnermut ilapittuutaavoq.  Qallunaat sulianik sullissisartut kalaallit nunaanni pissutsinik ilisimasaqaratik isumaginninnermi suliassaqarfimmi unammilligassat ilaannik aaqqiisinnaanerat misilittagaqarfigineqarpoq, kisianni nuna qimakkaangassuk, ajornartorsiutit piffissaq sivisunerusoq eqqarsaatigalugu aaqqiivigineqarneq ajorput.

Siunissami paatsuuisoqannginniassammat, qulaani allaaserineqartut tunngavigalugit Danmarkimit ikiorneqarnissamik Naalakkersuisut kissaateqarnerat qularutigineqassanngitsoq, Naalakkersuisut KNR-imut erseqqissumik erseqqissarusuppaat.

Attaveqarfissaq

Paasisaqarnerorusukkuit naalakkersuisup allattaa Inger Heilmann Larsen på e-mail: ihla@nanoq.gl atorlugu imaluunniit tlf. + 299 554160 atorlugu attavigiuk.