Naalagaaffiit Peqatigiit ilaqutariinnut ullorititaa 15. maj 2019 malunnartinneqassaaq

Nunat assigiinngitsut akornanni ilaqutariinnut ullorititaq ullortut immikkut ittutut malunnarteqqullugu Naalakkersuisut ilaqutariit tamaasa kaammattorpaat, taamaaliornikkut qanigisat nuannaaqatiginissaat ukkatarineqaqqullugu ilaqutariinnerlu qiimmattaatigeqqullugu

Pissusissamisoortumik kiisalu ataasiussusermik tunngaviusutut inuiaqatigiinnitsinni ilaquttat tunngaviulluinnarput.  Inuiaqatigiinni ilaquttat naleqarnermik pilersitsiviunerpaasarput, inuunitsinnilu atortuagassatsinnik inooqatigiinni ileqqunik pilersitsisarlutik ingerlatitseqqittarlutillu.  Nunat assigiinngitsut akornanni ilaqutariinnut ullorititaq ilaqutariit tamarmik qanigisatik peqatigalugit nalliuttorsiutigissagaat Naalakkersuisut kaammattuutigaat.              

Ilaquttagut inuiaqatigiinnitsinni tunngaviulluinnarput.  Piffissap ingerlanerani ilaqutariit assigiinngitsorpassuarnik iluseqaleriartorput, aamma ilaqutariit assigiinngitsut tamaasa nalliuttorsiutigalugit immitsinnullu nalliuttorsiutigaluta ilaqutariinnut ullorititaq atussavarput.  Kalaallit Nunaanni nutaaliaasumi ilaqutariit suli kinguaariinnik arlalinnik ilaqutarpassuarnillu inuttaqartut inissaqartinneqassapput.  Ilaqutariippassuit ilaqutariinnut ullorititaq qanigisaminnik piffissamik atuiffigissagaat neriuutigaara.  15. maj ulloq tassaasariaqarpoq smartphonitsinnik atuinngiffipput immitsinnullu najuuffipput.  Pinngortitaliaritsi, pinnguaammik pinnguaqatigiikkitsi, mamartunik nereqatigiikkitsi imaluunniit tussiarfissuaq takkutilersoq pillugu piareersaaqatigiikkitsi.” Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq.

Ilaqutariinnermut politikki ataatsimoortoq Naalakkersuisut 2019-imi saqqummiutissavaat, taannalu ataatsimut isiginnittunik sunniuteqarluartussanik suliniutinik ilanngussaqassaaq taamaalilluni meeqqat inuusuttullu ilaqutariinni ingerlalluartuni peroriartorniassammata ineriartorlutillu.  Naalakkersuisut akornanni ilaqutariinnut politikki ataatsimoorussamik suliamut piginnittuunermik akisussaasuunermillu pilersitsissaaq, taamaalilluni politikki sunaagaluartorluunniit ineriartortinneqarpat, ilaqutariit salliutinneqassallutik.

Ilaqutariit assigiinngitsorpassuarnik iluseqarput annertussuseqarlutillu.  Kalaallit Nunaanni Naatsorsueqqissaartarfiup kisitsisaatai malillugit 1. januar 2019-imi inuit 55.434-it ilaqutariinni 30.075-ini nunamilu inoqutigiinni 22.071-isuni najugaqarput.  Tassa agguaqatigiissillugu inoqutigiinni ilaqutariit 1,36-iupput.  Kalaallit Nunaanni Naatsorsueqqissaartarfiup nalunaarusiaa malillugu ilaqutariit tassaapput inoqutigiinni inuk ataaseq arlallilluunniit imminnut aappariinnikkut imaluunniit ilaqutariinnikkut ataatsimoortut.  Inoqutigiit ilaqutariinnik arlalinnik ilaqarsinnaapput, illuatungaanili ilaqutariit inoqutigiinnit arlalinnit ilaasortaqarsinnaanngillat.

Kikkut tamarmik akisussaassusermik tigusinissaat ullormillu qanigisatik ilagalugit malunnartitsinissaat Naalakkersuisut kaammattuutigaat.

Attaveqarfissaq

Paasisaqarnerorusukkuit naalakkersuisup allattaa Inger Heilmann Larsen på e-mail: ihla@nanoq.gl atorlugu imaluunniit tlf. + 299 554160 atorlugu attavigiuk.