Kalaaleq Naalagaaffiit Peqatigiinni immikkut ilisimasalittut toqqarneqarpoq

Kalaaleq Naalagaaffiit Peqatigiit Nunat Inoqqaavisa Oqaasissaqarfiinut Ataavartumik Suleqatigiiffimmut immikkut ilisimasallit ilaasortaatitaattut qinerneqarpoq

Tove Søvndahl Gant Naalagaaffiit Peqatigiit Nunat Inoqqaavisa Oqaasissaqarfiinut Ataavartumik Suleqatigiiffimmut immikkut ilisimasallit ilaasortaatitaattut qinerneqarpoq.  Piffissami 2020-2022 ilaasortaassaaq.

Tovep qinerneqarnera ajunngilluinnarpoq tassami Naalakkersuisunit Naalagaaffiit Peqatigiit Nunat Inoqqaavisa Oqaasissaqarfiinut Ataavartumik Suleqatigiiffimmi kalaallimik immikkut ilisimasallittut sinniisoqarnissaa pingaartinneqarnikuummat

Naalagaaffiit Peqatigiit Nunat Inoqqaavisa Oqaasissaqarfiinut Ataavartumik Suleqatigiiffik nunap inoqqaavi pisinnaatitaaffii pillugit oqalliffinni pingaarnerit ilaanniippoq. Suleqatigiiffiullu suliassaqarfiat ilagaat peqqinnissaq, ilinniartitaaneq kiisalu nunap inoqqaavisa inuttut pisinnaatitaaffii sammissallugit.

Tove Søvndahl Gant EU-mi Ataatsimoorluni Nunanut

Allanut Kiffartuussivimmi inuit pisinnaatitaaffii pillugit immikkoortotaqarfianni nuna tarmarmiusumi immikkut ilisimalittut Bruxellesimi suliffeqarpoq. Sammisai pingaarnerit ilagaat nunap inoqqaavisa pisinnaatitaaffii. Taassumap saniatigut Tove ukiut arlalinni Namminersorlutik Oqartussani nunap inoqqaavisa pisinnaatitaaffii pillugit suliaqarnikuulluni, Københavnimi Kalaallit Nunaat Sinniisoqarfiani pisortaanikuulluni kiisalu Issittumi Siunnersuisoqatigiinni Nunap Inoqqaavisa Allattoqarfiani pisortaanikuulluni. Taamatuttaaq Tove Søvndahl Gant nunat tamat akornnanni nunap inoqqaavisa pisinnaatitaaffii pillugit suleqatigiiffinni arlalinni peqataasarsimalluni.

”Tove nunap inoqqaavisa pisinnaatitaaffii pillugit suliarpassui tunngavigalugit Ataavartumik Suleqatigiiffimmi ilaasortaalernissa kiisalu Issittumi nunap inoqqaavi pisinnaatitaaffii pillugit ukkatarinissinnaanissaanut piukkunnarluinnartutu isigaara” Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Bagger oqaaseqaateqarpoq.

Annertunerusumik paasisaqarusunnermi naalakkersuisoqarfimmi pisortaq Kenneth Høegh attavigineqassaaq. Email: kenh@nanoq.gl imaluunniit Oqa:. +299 56 56 04