“Meeqqanik atornerluisarneq akuerisinnaanngilluinnarparput”

Kommunini politikerinit Naalakkersuisunillu ataatsimoorussamik oqaaseqaat

Ippassaq tallimanngornermi ulloq 10. maj 2019 Naalakkersuisut nunamilu borgmesterit politikkikkut ataqatigiissaarisoqatigiit ataatsimiinneranni katersuupput. Ataatsimiinneq taanna tunuliaqutaralugu Kalaallit Nunaanni meeqqanut inuusuttunullu pissutsit pillugit tulliuttoq ataatsimoorussamik oqaaseqaat saqqummiunneqarpoq:

Kinguaassiuutitigut atornerluisarneq sumiginnaanerlu, sapaatip akunnerani kingullermi tusagassiuutitigut nalunaarutigineqartartoq pillugu taamaattoqartarnera sakkortuumik akuerisinnaanngilluinnaratsigu oqaatigissavarput.

Meeqqanik inuusuttunillu atornerluisarneq qaquguluunniit akuerineqarsinnaalinngisaannassaaq, unammilligassallu annertuumik pimooruppagut.

Nunamut tamarmut politikeritut kommuninilu politikeritut ullumikkut pissutsit pillugit saneqqunneqarsinnaanngitsumik akisussaaffeqarpugut.

Akisussaaffiup taassuma kinguneraattaaq uagut politikeritut innuttaasut peqataatittariaqaratsigit: - unammilligassap assigiinngitsorpassuarnik katitigaaneranut tunngatillugu, pingaarnertullu piffinni pissutsit aaqqinneqarnissaannut pitsanngorsarneqarnissaannullu tunngatillugu.

Massakkut suliniutitta ineriartortinnissaat pitsanngorsarneqarnissaallu pisariaqarpoq.  Suliaq tamanna nukissat suliniutillu pioreersut aallaavigalugit ineriartortillugillu ingerlanneqassaaq.

Suliniutigut amigartut naammanngitsulluunniit pillugit immitsinnut assuarinissatsinnut  piffissaanngilaq. Taarsiulluguli oqaloqatigiinneq suleqatigiinnerpullu annertunerusumik patajaallisassavarput.  Oqaatigineqartartut timitalertariaqarpagut.

Namminersorlutik Oqartussat, kommunit aamma qallunaat naalagaaffianni oqartussaasut, taama malittariillutik – politiit suliniuteqarnerisigut, kinguaassiuutitigut atornerluisarnerit suliarineqartarneranni pitsaaliorneqarnerannilu annertuumik akisussaaffeqarput.  Meeqqanut inuusuttunullu kinguaassiuutitigut atornerluisarnerit pillugit unammilligassat aaqqiiviginiarnerini qanimut kinguneqarluartumillu suleqatigiinnissarput pingaaruteqarluinnarpoq.

Attavissaq

Paasisaqarnerorusukkuit naalakkersuisup allattaa Inger Heilmann Larsen e-mail: ihla@nanoq.gl aqqutigalugu imaluunniit tlf. + 299 554160 atorlugu attavigiuk