Qallunaat oqartussaasuinik, fondinik aamma soqutigisaqaqatigiiffinnik Naalakkersuisut suleqateqarput

DR-ip piviusulikkersaarutaanut ”Byen hvor børn forsvinder”-imut, 6. maj 2019-imi aallakaatinneqartumut, atatillugu ilaatigut Naalakkersuit avataanit ikiorneqarnissamik itigartitsisimasutut KNR-ip issuarpai.  Taamatut saqqummiussineq Naalakkersuisoq Martha Abelsenip ilisarisinnaanngilaa.  Tassunga atatillugu Isumaginninnermut, Inatsisinillu Atuutsitsinermut Naalakkersuisoq qallunaat oqartussaasuinik suleqateqarnerup annertussusaa pillugu nassuiaateqarnissaq kissaatigaa.

Isumaginninnermik suliassaqarfiup patajaallisarneqarnissaa ikorfartorneqarnissaalu pillugit suliniutit Naalakkersuisut qallunaallu oqartussaasui qanittumik suleqatigiipput.  Qanittumik suleqatigiinnermut tassunga Børne- og Socialministeeriaqarfik aamma Justitsministeeriaqarfik ilaapput.

Isumaginninnermut suliassaqarfik patajaallisarniarlugu Naalakkersuisut 2017-imi Isumaginninnermut Aqutsisoqarik pilersippaat.  Kalaallit nunaanni kommunit ikiornissaat siunnersornissaaallu Isumaginninnermut Aqutsisoqarfiup ilaatigut suliassarai.

Isumaginninnermut Aqutsisoqarfiup pilersinneqarnermininngaanniit Børne- og Socialministeeriaqarfik aamma qallunaat Socialstyrelsiat qanimut suleqatigai.  Tassunga tunuliaqutaavoq Kalaallit Nunaanni meeqqat inuusuttullu aarlerinartumik inissisimasut pillugit Namminersornerullutik Oqartussat suliniutaannut qallunaat isumaginninnermut nunallu iluanut suliniutinut aningaasaliissutinit ukiuni 2017-miit 2020-imut katillugit 10 mio. kr.-it aningaasaliissutigimmatigit. 

Sullissinermik suliassaqarfiup, ulloq unnuarlu paaqqinniffinnut suliassaqarfiup aamma kommunini ilaqutariinnut sullissiviit patajaallisarneqarnissaat ineriartortinneqarnissaallu suleqatigiinnerup immikkut ittumik siunertaraa.  Nalunaarusiami ’Kalaallit Nunaanni meeqqanik inuusuttunillu isumaginninnikkut aarlerinartorsiortunik sullissinermi Kalaallit Nunaanni Namminersorlutik Oqartussanik tapersersuineq’-mi allaaserineqartut ineriartortitsinissamut suliniutissatut innersuussutigineqartut 29-it kivinneqarnissaat qallunaat kalaallillu oqartussaasa piviusumik suleqatigiissutigaat.

Naalakkersuisoq Martha Abelsen oqarpoq:  “Meeqqanut- inuusuttunullu suliassaqarfiup patajaallisaarneqarnissanut suliaqarnitsinni Danmarminit ikorneqarnerput Naalakkersuisunit nuannaarutigeqaarput.  Qallunaat Socialstyrelsiannik suleqateqarnermut atatillugu oqaatigissavara sulisutsinnut Kalaallit Nunaannilu sulianut aallartinneqareersunut ataqqinnippalaartumik pullaveqarnerat immikkut nuannaarutigigakku.  Kalaallit Nunaata nammineerluni suliassaqarfimmik siunissami kivitsinissaanut pisariaqarluinnartumik aaqqissuussinernik pioreersunik ilisimasallu annertusarneqarnerannik ikorfartuineq pullavittut atorpaat.  “Nammineq napatissinnaasumik” isumaginninnermi suliassaqarfik kivissagutsigu, taava avataanit ikiorneqarneq imminut ikiornissamut ikiuutaasaaq, aamma suliassat taakkunginnga suliarineqassanngillat”.

Kalaallit Nunaanni Eqqartuussiveqarneq pillugu Siunnersuisooqatigiit 2017-imi 2018-imilu ataatsimiittarneranni meeqqanik kinguaasiuutitigut atornerluisarneq aamma nakuusertarneq pillugu suliat aamma eqqugaasunut kannguttaatsuliortunullu suliniutit patajaallisarneqarnissaanni Danmarkip qanoq ililluni tapersersorsinnaanera  ukkatarineqarput.  Suliassaqarfimmik taassuminnga Justitsministeeriaqarfiup ukkatarinninnera sulinitigineqartullu aalajangersimasut suliarineqartut Naalakkersuisut assut nuannaarutigigaat Naalakkersuisoq Martha Abelsenip Justitsministerimik 2018-imi decembarimi ataatsimeeqateqarnermini paasititsissutigaa. 

Qallunaat fondii soqutigisaqaqatigiiffiilu amerlasuut Kalaallit Nunaanni sulipput, taamaaliornerallu nuannaarutigeqaarput” Naalakkersuisoq Martha Abelsen oqarpoq nangillunilu “Isumaginninnermi suliassaqarfimmi unammilligassarpassuaqarpugut, ineriartortitsinermilu peqataarusuttut tamaasa atorfissaqartippagut.”

Suleqatigiissutigineqartunut aalajangersimasunut assersuutissaavoq suliniut Kattunneq.  Fondinit kattuffinnillu arlalinnit suleqatigiissutaavoq, taassumalu angerlarsimaffinni nakuusertarnermut akiuiniarnermi suliniutit pataallisarneqarnerat siunertaraa. Suleqatigiinneq pitsaasoq assersuutigineqartoq taanna Naalakkersuisoq Martha Abelsenip februarimi Kalaallit Nunaata Københavnimi sinniisoqarfiani ataatsimiititsineranut aallaaviuvoq.  Tassani fondinit soqutigisaqaqatigiiffinnillu inuit 30-it missaat peqataapput.  Ataatsimiinneq aalajangersimasumik aataatsimik siunertaqarpoq, tassalu suleqatigiinnissamik suleqatigiinnerullu ataqatigiissaarnissaanik qaaqqusineq..

Isumaginninnermi suliassaqarfiup pisariaqartinneqarluinnartumik ineriartortinneqarnissaanut kikkut tamarmik peqataarusuttut tamaasa tikilluaqquagut.  Taamaattoq ikiuinerit ataqatigiissaarneqarnissaat pisariaqarpoq, taamaalilluni avataanit ikiuneq unippat ulluinaallu tikikkutsigit suliniutit ingerlaqqissinnaaniassammata.  Isumaginninnermut Inatsisinillu Atuutsitsinermut Naalakkersuisoqarfik taamatut ataqatigiissitsinissamut qaqugukkulluunniit piareersimavoq”  Naalakkersuisoq Martha Abelsen oqarpoq.

Attavissaq

Paasisaqarnerorusukkut naalakkersuisup allattaa Inger Heilmann Larsen e-mailikut: ihla@nanoq.gl imaluunniit tlf. + 299 554160-ikkut attaveqarfigiuk