Peqatigiiffik ’Bevar Narsarsuaq’ anivoq pillugu nutaarsiassamut oqaaseqaat

Naalakkersuisoq Karl Frederik Danielsen-imit

Ullumi 10. maaji peqatigiiffimmit ”Bevar Narsarsuaq” saaffiginnissummik tigusaqarpunga, taannalu aamma internetikkut nutaarsiassaqarfiup sermitsiaq.AG-p saqqummiuppaa, imatut qulequtserlugu: 'Bevar Narsarsuaq' anivoq.

Naalakkersuisunit Narsarsuup siunissaa ilungersuunneqarmat qularineqassanngilaq. Tassani inuit 120-t sinnerlugit amerlassusillit, siunissaminnik nalorninartorsiortut pineqarput. Taamaattumik peqatigiiffiup suleqatigiissitami suliat inaarsarneqarnissaannut peqataarusunnginnera uggoraara.

Nalunaarusiaq suleqatigiissitamit naammassillugu suliarineqanngimmat suli tigunngilara. Kisiannili peqatigiiffiup ”Bevar Narsarsuaq”-p kissaatai aalajangersimasut tamakkerlutik misissuiffigineqarsimassasut qularinngilara. Taanna suliassat allattorsimaffianni akuerisami pingaarnertut siunertaasut ilagaat.

Suliassat allattorsimaffianni aallaqqaammut allassimasut naapertorlugit, suliat taannalu tunngavigalugu paasissutissat aammalu inerniliinerit allanut isertuunneqarlutik ingerlanneqarput. Tamatumani suleqatigiissitap eqqissilluni sulinissaa eqqarsaatigineqarpoq. Peqatigiiffiup ”Bevar Narsarsuaq” sinaakkusiussanik isumaqatigiissutigisaraluatsinnik naammaginninnginnera ajuusaarnartoqartippara.

Isumaqatigiittoqaraluarpat isumaqatigiittoqanngikkaluarpalluunniit peqatigiiffiup ”Bevar Narsarsuaq” tusaaniarneqarnissaa qulakkeerniassavara. Politikkikkut aqutsisooqatigiit qanittukkut ataatsimiissapput. Apriilimi ataatsimiinnissaat aallaqqaammut aalajangiunneqarsimagaluarpoq. Taanna ajoraluartumik sila, tamatumalu kingorna Naalakkersuisuni nikisiterisoqarnera peqqutigalugit taamaatinneqarpoq.

Annertunerusumik paasisaqarusunnermi naalakkersuisup allattaa Steve Sandgreen stes@nanoq.gl attaveqarfigineqassaaq.