Nuna tamakkerlugu ataatsimoortumik avatangiisinut eqqagassalerinermullu aaqqiissutissat

Sapaatip akunnerani matumani nunatsinni kommunini tamani avatangiisilerisut, kommunit eqqagassalerinermi ingerlatseqatigiiffiat ESANI A/S aamma Pinngortitamut Avatangiisinullu Naalakkersuisoqarfik Nuummi ulluni avatangiisit pillugit sammisaqartitsivinni katersuupput, eqqagassalerinermi ajornartorsiutinut ataatsimut aaqqiissutissat aammalu avatangiisini unammillernartoqartinneqartut allat arlallit oqallisigalugit. Ullut avatangiisit pillugit sammisaqartitsiviusut ukiumoortumik aalajangersimasumik pisarput, taakkununngalu Pinngortitamut Avatangiisinullu Naalakkersuisoqarfik kommunit qanittumik suleqatigalugit aaqqissuussisarpoq.

Ukioq manna ulluni avatangiisit pillugit sammisaqartitsiviusuni pingaartumik nuna tamakkerlugu eqqagassalerinermi aaqqiissutissat nutaat, pilersinneqartussatut kommunit Naalakkersuisullu ataatsimoorlutik isumaqatigiissuteqarfigisaat siunnerfigineqarput. Ullumikkut eqqakkat ikuallaaviit pioreersut ikuallassinnaasaannit 30 %-ingajammik amerlanerusut eqqarneqartarput. Taamaattumik eqqakkat suliarineqanngitsut nunatsinni sumi tamaani katersuupput.

Eqqagassalerinermi aaqqiissutissami nutaami nuna tamakkerlugu ikuallaaviit nutaat, siunissami illoqarfinnit nunaqarfinnillu tamanit eqqakkanik tigooqqaasussat Sisimiuni Nuummilu sananeqassapput. Ikuallaaviit nutaaliat atulernerisigut ikuallaaviit pujui pitsaanerujussuarmik salinneqartalissapput, ikuallaavinnilu ikuallaanermit kissap sinnera nukissiuutitut mingutsitsinngitsutut atorneqarsinnaassaaq. Ikuallaaviit nutaat pisinnaasaat annertoorsuusussaammat, aamma nunatsinni eqqaavissuarnit amerlasuunit eqqakkanik tigooqqaaneq aallartissinnaalissaaq. Kommunit eqqagassalerinermi ingerlatseqatigiiffik kommuninit ataatsimut pigineqartoq ESANI A/S pilerseqqammerpaat, taannalu eqqagassalerinermi aaqqiissutissanut nutaanut siuttuussaaq.

Ulluni avatangiisit pillugit sammisaqartitsiviusuni eqqakkat sammineqarnerisa saniatigut aamma ilaatigut anartarfilerinermi aaqqiissutissat aammalu pinngortitami plastikkit ajornartorsiutaanerisa qanoq iliorluni ataatsimoortumik qaangerneqarsinnaanera oqallisigineqarput. Ullut avatangiisit pillugit sammisaqartitsiviusut kommunit aamma Namminersorlutik Oqartussat akornanni qanittumik pitsaasumillu suleqatigiinnissamut pingaaruteqartorujussuupput.

Annertunerusumik paasisaqarusunnermi Immikkoortortaqarfimmi Pisortaq Karen Anne Arleth telefon 551585-imut imaluunniit mail knar@nanoq.gl aqqutigalugu attaveqarfigineqarsinnaavoq,