Nunanit allanit Kalaallit Nunaanni aalajangersimasumik aallartitaqalernissaq

Kalaallit Nunaanni aalajangersimasumik aallartitaqalernissaq Naalakkersuisunit tikilluaqquarput

Amerikap Københavnimi aallartitaqarfia ilisimatitsivoq Nuummi aalajangersimasumik aallartitaqalernissamik aalajangiisoqarsimasoq. Issittumut Kalaallit Nunaannullu USA-p ukkatarinninnerata annertusineranik, taamatullu amerikamiut Kalaallit Nunaannik qanimut oqaloqatiginninnissamik soqutiginninneranik ersersitsivoq – ineriartorneq Naalakkersuisunit tikilluaqquneqartoq.

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq, Ane Lone Bagger ima oqaseqarpoq:
”Kalaallit Nunaat amerikap avannarliup nunavittaanut ilaavoq. Nunap sumiiffiinnaatiguungitsoq aammali nunap inuii, kulturiat oqaatsillu Alaskamiunik Canadallu Issittortaanik avitseqatigiissuteqarfigalugit.

Assigiissutigut taakku eqqarsaatigalugit USA-p Kalaallit Nunaatalu akornanni aningaasatigut avitseqatigiinnikkullu suleqatigiissinnaanerit naatsorsuutigineqartariaqarput.

Taamaattumik USA Nuummi aalajangersimasumik aallartitaqalernissaat nuannaarutigaarput, oqaluuserisassaqarluarattami. Tamatuma amerikamiut nunatsinnut inuiaqatigiinnullu paasinninnerulersissavaat, tamannalu pitsaasumik angusaqarfiusumillu suleqatigiinnissamut pingaaruteqartuuvoq.

Uagut tungitsinnit amerikami avannarlermi nunat sanilerisavut attavigineruleqqinnissaa sulissutigaarput. Mittarfinnut suliniutit 2023 aallarnerfigalugu toqqaannartumik Nunatsinnit USA-mut timmisartuussisinnaanngornissamut periarfissaqalissaaq. Taakku saniatigut imaatigut angallassinermi 2019-mit ilaatigut Portlandimit Mainemiittumut Royal Arctic Line – Eimskip suleqatigalugu ammaasseriissaaq. Ineriartornerup tamatuma nunarput annertunerusumik tikikkuminarsisissavaa.

Neriuutigisatsitut naatsorsuutigisatsitullu amerikamiut Nuummi aallartitaqalernissaat saniligut amerikamiut suleqateqarnerusinnaanermut ammaassisuussaaq. Amerikamiut aalajangersimasumik aallartitaq peqatigalugu aningaasaliinermut, niuernermut ilinniartitaanermut il.il. suleqatigiinnerup annertusinissaa qilanaaraarput, nunatsinnullu tikilluaqquagut.”


2013-mi Island Nuummi sinniisoqalerpoq. Tamanna Kalaallit Nunaannut ineriartornermut pingaaruteqarpoq, tassami Islandip General Konsuliata sorsunnersuup aappaata qaangiunneranit sinniisoqarfimmi ammaanerit siullersaraat. USA Nuummi siusinnerusukkut sinniisoqarnikuuvoq. 1940-mit 1953-mut maanna nakorsaaneqarfiup illutaani allaffeqarsimallutik. Illu taanna amerikamiut nammineq sananikuuaat.