DR-ip piviusulersaarusiaa ”Byen hvor børn forsvinder” pillugu

Inuiaqatigiinni ajornartorsiutit ilungersunartut annertuut ilaat Tasiilami kinguuaassiuutitigut atornerluisarnerit imminoortarnerillu pillugit DR-ip piviusulersaarusiaata ukkatarai. Isumaginninnermi suliaqarnermi suli annertuunik ajornartorsiuteqartoqartoq piviusulikkersaarutip takutippaa. Inooqatigiinni meeqqat ilaqutariillu navianartumiittut pillugit Naalakkersuisut ukkatarinnereerput sulilu ukkatarinnissallutik.

DR-ip piviusulersaarutaani “Byen hvor børn forsvinder”, 6. Maj 2019-imi DR2-kkut aallakaatinneqartumi inuiaqatigiit nikanartutut takutinneqarput, tassani innutaasut tallimaagaangata ataaseq imminoortarluni, meeqqat pingasuugaangata ataaseq kinguaassiuutimigut atornerlunneqartarluni, kiisalu meeqqat marluugaangata ataaseq Kommuneqarfik Sermersuumi isumaginnikkut suliassatut suliassanngortinneqartarluni.

Piviusulersaarut Naalakkersuisut ilumoorullugu tiguaat, tassami meeqqat ulluinnarni atornerluinernik imminoornernillu sunneqarneqarlutik peroriartortussaanngillat. Inooqatigiinni allaffissornikkullu ajornartorsiutit amerlasuut piviusulersaarutip tikkuarpai, taakkulu Naalakkersuisut, kommunit suleqatigalugit, aaqqiiviginneqarnissaat anguniarlugit sulissuteqareerput. Suliassaqarfiit arlaqartut isumaginninnikkut annertunerusumik suliniuteqarfigineqartariaqartut, soorlu atornerluinerit, piviusulersaarutittaaq tikkuarpaa.

Naak kinguaassiuutitigut atornerluinerit malunnaatilimmik appariarsimagaluartut, suli eqqugaasut amerlapput aamma ikiorneqarnissamik pisariaqartitsisut amerlapput. Siunissami kinguaassiuutitigut atornerluisarnerit imminoortarnerillu pitsaaliorniarlugit Naalakkersuisut kommunit suleqatigalugit, pingaartumillu Kommuneqarfik Sermersooq suleqatigalugu, suliniuteqaqqinniarput. Nunaqarfimmiunit illoqarfimmiunillu kinguaassiuutitigut atornerluisarnernik akuersaanngilluinnarnissaq aamma atornerluinerit tarnikkut timikkullu kingunerisartagaasa ilumoorunneqarnissaat pisariaqarpoq.

“Piviusulersaarut aalassatsitseqaaq, isumaqarpungalu suut tamaasa aqqutigalugit meeqqat taamaa inuuneqarnissaat pitsaaliussagipput. Taamaattoqarnera akuerisinnaanngilluinnarparput. Meerartatsinnut atugassarititaasut pitsanngorsarneqarnissaat tamatta akisussaaffigivarput. Inuiaqatigiiffigisatsinni pissutsit iluatsissappata, taava ataatsimoorluta kivitseqataasariaqarpugut. Isumaginninnermi suliaqarnermi nunami politikkerit inatsisiliornernut sinaakkusersuinernullu akisussaasuupput. Ulluinnarni inatsisit malinneqarnissaat kommunit akisussaaffigivaat. Inuilli pissusilersuutiminnik allanngortitsinissamut nunaqarfimminni illoqarfimminnilu ikiuunnissaminnullu aammattaaq akisussaaffeqarput.”
Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq.

Isumaginninnermi unammilligassat ullormiit ullormut aaqqinneqarsinnaanngillat, aamma naak meeqqat illersorneqarnissaat pisinnaatitaaffiilu pillugit meeqqat tapersersorneqarnissaannut inatsimmi aalajangersakkat erseqqikkaluartut, isumaginninnermi unammilligassat siunissaq ungasinnerusoq eqqarsaatigalugu suliniutinik pisariaqartitsivoq.

“Tasiilamitut isumaginninnermi unammilligassat aaqqiivigissagutsigit, oqartussaasoqarfiit assigiinngitsunik suliallit akornanni tamatta ataatsimoorluta kivitseqataasariaqarpugut. Inuiaqatigiinnitsinni allanngortitsinissaq tamatta ataatsimoorluta akisussaaffigivarput. Isumaginninnermi ajornartorsiutigut qiviarsinnaasariaqarpagut, oqallisigalugit aamma iliuuseqarnissamut piareersimaffigalugit. Politikeriusugut iliuuseqartariaqarpugut akisussaaffimmillu tigusilluta. Tamanna aamma angajoqqaanut inuiaqatigiinnilu innuttaasunut atuuppoq” Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq.

Kinguaassiuutitigut atornerluinerit, aanngajaarniutinik atornerluinerit assigisaallu pillugit ukiut ingerlanerini Naalakkersuisut oqartussaasoqarfiillu assigiinngitsunik suliallit akornanni suliniutik arlalinnik aallartitsisarput.

Pinerluttulerinermi inatsit nutaaq aqqutigalugu meeqqamik 12-it inorlugit ukiulimmik atoqateqarneq allatulluunniit kinguaassiuutitigut kannguttaatsuliorneq pinngitsaaliinertut nalilerneqassaaq, qanorluunniit iliorluni tamanna pisimagaluarpat.

Killiliisa, kinguuaassiuutitigut atornerluisarnerit akiorniarlugit periusissiaq atorlugu kinguaasiuutitigut atornerluisarnerit appartinneqarnissaat Naalakkersuisut kissaatigaat, taamaalilluni 2022 tassaassalluni ukioq atornerluisoqartarunnaarnermut ikaarsaariarfiusoq. Killiliisamik suliaqarneq meeqqat, inuusuttut aamma inersimasut kannguttaatsuliorfigineqarsimasut amerlanerit saqqummernerannik kinguneqarsimavoq, taakkulu kinguaassiuutitigut atornerluisarnerup ukkatarineqarnerulerneranut iluaqutaapput. Taamaattoq kinguaassiuutitigut atornerluisarnerup paqumagineqarunnaarnissaa suli pisariaqartinneqarpoq, aamma tamanna kommunini qitiusumilu Naalakkersuisuni suliaqaqqinnissamik pisariaqartitsivoq.

Oqarasuaatit atorlugit siunnersuisarfik Tusaannga Naalakkersuisut qanittumi pilersippaat, tassani kinguaasiuutitigut atornerlunneqarsimasut kikkut tamarmik, imaluunniit imminoornissamik eqqarsaateqartut ikiorneqarnissaminnik periarfissaqalerput. Oqarasuaatikkut siunnersuisarfik 801180 atorlugu imaluunniit 1899-imut SMS-erluni attavigineqarsinnaavoq.

Meeqqat inuusuttullu sumiginnarneqartarnerat akiorniarlugu iliuusissanut pilersaarut Naalakkersuisut 2019-ip ukiaani saqqummiutissavaat. Kommunini isumaginnittoqarfinni sullissinerup kiisalu angajoqqaatut angajoqqaat inissisimanerisa patajaallisarneqarnissaat ilaatigut iliuusissanut pilersaarumi ukkatarineqassapput.

Annertunerusumik paasisaqarnerorusukkuit naalakkersuisup allattaa Inger Heilmann Larsen e-mail: ihla@nanoq.gl aqqutigalugu imaluunniit tlf. + 299 554160 aqqutigalugu attaveqarfigiuk