Issittumi Siunnersoqatigiiffimmi Ministerit ataatsimeersuaarneranni 2019-imi peqataaneq

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Bagger Issittumi Siunnersoqatigiinni ministerit ataatsimeersuaarneranni Finlandimi Rovaniemi maajip arfineq-aappaani 2019-imi peqataavoq.

Finland qaaqqusisuuvoq tassanilu ministerit ataatsimoorlutik oqaaseqaataat aammalu siunnersuisoqatigiinni siulittaasup oqaaseqaataa akuersissutigineqarluni, taakkualu Finlandip siulittaasuunermini suliaminik pingaarnernik sisamanik makkunani imaqarpoq: Avatangiisimik illersuineq, attaveqaqatigiinneq atassuteqarnerlu, silasiornermi suleqatigiinneq kiisalu ilinniartitaaneq. Issittumi Siunnersuisoqatigiinni ministerit ataatsimoorlutik oqaaseqaataat ilutigalugu siunnersuisoqatigiinni ataqatigiinneq isummannarneqarpoq.

Taamatuttaaq International Maritime Organization Siunnersuisoqatigiinni malinnaasutut ilaasortatut ilanngullutik (observer), tassani malinnaasutut ilaasortat tamakkiisumik 39-iupput.
Naalakkersuisoq Ane Lone Bagger Issittumi Siunnersuisoqatigiinni sulinermut tunngatillugu ima oqaaseqarpoq: ”Uannut pingaarpoq savalimmiunut danskinullu erseqqissarnissaa uagut kalaallit Kunngeqarfiup Issitummi innutaasuusugut. Taamaattumik Kunngeqarfiup Issittumi suliaqarnerani uagut malunniuteqarnerusumik inissisimanissarput kissaatigaara.”

Ministerit naapinneranni Naalakkersuisoq Ane Lone Bagger oqaaseqarnermini erseqqissaavoq Kalaallit Nunaanni Issittumilu innuttaasut atugarissaarnissaat isumannaarniarlugu suleqatigiinneq pingaarnertut aqqutissaasoq, soorlu Issittumi Siunnersuisoqatigiinni suleqatigiinnikkut.

Taamatuttaaq Issittumut soqutiginninneq annertusiartortoq tikilluaqquaa, soqutiginninnikkummi ajunngitsumik sulinikkut innuttaasunut assigiinngitsorpassuartigut iluaqutaasinnaammat, erseqqissarlugulu Issittumi suleqatigiinneq aqqutigalugu kinguaariinnut tulliuttunut periarfissanik pilersitsissasoq.

Naalakkersuisup Ane Lone Baggerip aammattaaq Islandip nunanut allanut ministeria Guðlaugur Þór Þórðarson, Arctic Economic Councilip siulittaasussaa Heiðar Guðjónsson aammalu ICC eqqartueqatigilluarpai.
Issittumi Siunnersoqatigiiffimmi ministerit ataatsimeersuaarnerat ukioq allorlugu ingerlanneqartarpoq, tassani kaaviaartumik siulersuisuutitaqarneq ingerlaqqittarluni, ukiullu kingullerni marlunni siulittaasuusut suliaat inernerisimasai saqqummiunneqartarlutik. Finland Issittumi Siunnersuisoqatigiinni 2017-miit 2019-p tungaanut siulersuisuuvoq 2019-miillu 2021-p tungaanut siulersuisussamut nutaamut Islandimut ingerlatitseqqilluni. Islandip siulersuisuunissamini pilersaarut saqqummiuppaa tassanilu pingaartitat sisamat sammineqassapput tassaallutik Issittumi Immami pissutsit, Silap pissusia mingutsitsinngitumillu nukissiorneq, Issittumi innuttaasut kiisalu ataavartumik ineriartortitsineq.

Annertunerusumik paasisaqarusunnermi saaffigineqarsinnaavoq Nunanut Allanut Naalakkersuisoqarfimmi pisortaq Kenneth Høegh, oqarasuaat +299 56 56 04